Tramp: Hörmüz boğazı tamamilə ABŞ-ın nəzarətindədir
ABŞ Prezidenti Donald Tramp Hörmüz boğazının tamamilə ABŞ-ın nəzarətində olduğunu bəyan edib.
AFN.az xəbər verir ki, Tramp bu barədə sosial media hesabında paylaşım edib.
ABŞ Prezidenti bildirib: "İran rəhbərliyi inanılmaz dərəcədə ikiüzlüdür. Onlar görüş keçirilməsini istəyirlər – bəziləri hətta 'yalvarırlar' deyərdi. Danışıqlar başlayır və yaxın gələcəkdə yenilərinin keçirilməsi planlaşdırılır. Amma sonra açıq şəkildə heç bir görüşün baş tutmadığını, heç nəyin müzakirə edilmədiyini və yalnız Omanla maraqlandıqlarını bildirirlər. Ardınca isə həmişə olduğu kimi, Hörmüz boğazına güclü şəkildə nəzarət etdiklərini iddia edirlər".
Tramp "Hörmüz boğazı onsuz da tamamilə ABŞ Hərbi Dəniz Qüvvələrinin və bizim 'blokadamızın', yaxud bəzilərinin dediyi kimi 'ABŞ-ın Polad Divarı'nın nəzarəti altındadır" deyə əlavə edib.
ABŞ Prezidenti daha sonra qeyd edib: "Biz istəmədiyimiz müddətdə İrana heç nə keçə bilməz və razılaşma əldə olunmayana və ya tam təslimiyyət baş verməyənə qədər də heç nə keçməyəcək. İran bunu qəbul etmək istəsə də, istəməsə də, əslində onilliklərdir özünün yaratdığı problemin həllindən danışırıq".
Tramp çıxışının sonunda İranın heç vaxt nüvə silahına sahib olmayacağını bir daha vurğulayıb.
