El Nino Panama kanalında gəmi keçidlərinin sayını azaldılır
Mərkəzi Amerikada yaşanan şiddətli quraqlıq səbəbindən Atlantik və Sakit okeanları birləşdirən strateji su yolunda yeni məhdudiyyətlərin tətbiq olunacağı gözlənilir.
AFN.az xəbər verir ki, Panama kanalını qidalandıran iki süni göldə su səviyyəsinin aşağı düşməsi ilə əlaqədar kanalın idarəetməsi gələn aydan etibarən gündəlik gəmi keçidlərinin sayının azaldılacağını açıqlayıb.
Açıqlamaya görə, gündəlik icazə verilən gəmi sayı sentyabrın 3-dən etibarən 36-dan 34-ə, sentyabrın 15-dən etibarən isə 32-yə endiriləcək.
Mərkəzi Amerika Sakit okeanındakı səth temperaturunu artıraraq külək və yağıntı balansını dəyişdirən El Nino iqlim hadisəsinin səbəb olduğu ağır quraqlıq dövrünü yaşayır.
Kanalın Səlahiyyətli Qurumu may-avqust ayları arasında bölgədə yağıntıların tarixi orta göstəricidən 34 faiz aşağı olduğunu və El Nino təsirinin bu göstəricini daha da azalda biləcəyini bildirib.
Dünya dəniz ticarətinin 5 faizini və ABŞ konteyner daşımalarının təxminən 40 faizini təmin edən Panama kanalına, xüsusilə Asiya ilə ABŞ arasında ticarət aparan böyük pərakəndə şirkətlər və enerji şirkətləri vaxta və xərclərə qənaət etdiyi üçün üstünlük verirlər.
Kanalın idarəetməsi su hövzəsində yağıntıların gözləntilərdən aşağı olması səbəbindən su yolunun uzunmüddətli dayanıqlılığını qorumaq məqsədilə bu addımların atıldığını açıqlayıb.
Administrasiya daha əvvəl də ən böyük gəmilər üçün maksimal suya oturma dərinliyinin azaldılması kimi müxtəlif suya qənaət tədbirlərini həyata keçirmişdi.
Oxşar məhdudiyyət 2023-cü ildə də yaşanmış, su səviyyəsinin azalması ilə gündəlik keçid sayı 38-dən 22-yə qədər endirilmişdi.
Bu vəziyyət ciddi gəmi növbələrinin yaranmasına səbəb olmuş və yükdaşıma şirkətlərini alternativ marşrutlar axtarmağa məcbur etmişdi.
Rəsmilər rezervasiyasız keçid etmək istəyən gəmilər üçün gözləmə müddətinin artacağını bildiriblər. Kanaldan istifadə edən gəmilərin böyük əksəriyyəti əvvəlcədən rezervasiya etdiyi halda, qalan keçid hüquqları hərrac yolu ilə satılır.
İran müharibəsindən əvvəl bu hərraclarda orta qalib təklif 135 min dollar olduğu halda, aprel ayında bir yükdaşıma şirkətinin keçid hüququ üçün 4 milyon dollar ödədiyi bildirilib.
Qarşıdakı həftələrdə yağıntı vəziyyətindən asılı olaraq əlavə məhdudiyyətlərin tətbiq oluna biləcəyi qeyd edilir. ABŞ tərəfindən inşa edilən kanalın əsas istifadəçiləri arasında ABŞ, Çin, Yaponiya, Çili və Cənubi Koreya yer alır.
Kanalı qidalandıran göllər eyni zamanda 4,2 milyon əhalisi olan ölkə sakinlərinin yarısının içməli su tələbatını ödədiyi üçün su ehtiyatlarının idarə olunması Panamada kritik əhəmiyyət daşıyır.
Orta hesabla iki ildən yeddi ilə qədər bir müddətdə müşahidə olunan El Nino hadisəsinin bu il tarixdəki ən güclü hadisələrdən birinə çevrildiyi bildirilir.
Baş verənlərin ardından Honduras hökuməti də ölkə ərazisinin 80 faizində quraqlıq siqnalı elan edib.
