Piratlar yenidən ortaya çıxmağa başlayıb
Qırmızı dəniz və Hörmüz boğazındakı qarşıdurmalar səbəbindən beynəlxalq dəniz nəqliyyatının Afrika Buynuzuna yönəlməsi və patrul qüvvələrinin bölgədən çəkilməsi somalili piratların fəaliyyətini son 10 ilin ən yüksək səviyyəsinə çatdırıb.
AFN.az xəbər verir ki, təhlükəsizlik üzrə ekspertlər ABŞ və İsrailin İranla yaşadığı qarşıdurmalar səbəbindən qlobal donanmaların Hörmüz boğazı və Qırmızı dənizə yönəlməsinin Somali sahillərində təhlükəsizlik boşluğu yaratdığını bildiriblər.
Qırmızı dənizdəki kommersiya nəqliyyatının təxminən 70 faizinin Cənubi Afrikadakı Ümid burnuna yönləndirilməsi gəmiləri Somali sahillərinə daha yaxın marşrutla hərəkət etməyə məcbur edərək piratlar üçün fürsət yaradıb.
Pirat qruplarının hədəfləri müəyyənləşdirmək və əlaqə saxlamaq üçün SpaceX-in Starlink peyk internet xidmətindən istifadə etməyə başladığı, əvvəllər ələ keçirdikləri gəmilərdən ana gəmi kimi istifadə edərək yeni hücumlar təşkil etdikləri bildirilir.
Bundan əlavə, fidyə gəlirlərinin bölgə iqtisadiyyatında yenidən dövr etməyə başlaması, bunun sosial struktur üzərindəki mənfi təsirləri və piratlığa qoşulma riskini yenidən artırır.
Ekspertlər 2011 və 2012-ci illərdə həyata keçirilən genişmiqyaslı beynəlxalq dəniz əməliyyatlarının mövcud şəraitdə təkrarlanmasının çətin olduğunu və problemin qalıcı həllinin qurudakı siyasi sabitliyin təmin edilməsindən keçdiyini vurğulayırlar.
