İrana yönəlmiş hücumların Pentaqona maliyyətinin 38 milyard dollara çatdığı təxmin edilir
ABŞ Konqresinin Büdcə Ofisi (CBO) İrana qarşı hərbi əməliyyat çərçivəsində baş verən qarşıdurmaların ABŞ Müdafiə Nazirliyinə (Pentaqon) xərcinin avqustun 1-nə təxminən 38 milyard dollar olduğunu bildirib.
AFN.az xəbər verir ki, CBO fevralın sonunda İrana qarşı “Epik Qəzəb Əməliyyatı” adı ilə başlayan hərbi əməliyyatın dəyərini əməliyyat xərcləri, alternativ xərc, iqtisadi təsirlər və mümkün əlavə xərclər olmaqla 4 əsas kateqoriya üzrə araşdırıb.
CBO yayımladığı hesabatda İranla yaşanan silahlı qarşıdurmanın əməliyyat xərclərinin avqustun 1-nə təxminən 38 milyard dollar olduğunu təxmin edib.
Hesabatda bu xərclərin istifadə olunan sursatların yenilənməsi, döyüşlərdə itirilən texnikalar, uçuş saatlarının artması, sahə əməliyyatları və yanacaq xərclərinin yüksəlməsi ilə əlaqədar olduğu bildirilib.
Qarşıdurmaların davam edəcəyi təqdirdə xərclərin artacağı qeyd edilən hesabatda şiddət səviyyəsindən asılı olaraq münaqişənin davam etdiyi hər əlavə ayın 2-3 milyard dollara başa gələcəyi, qarşıdurmaların genişlənməsi halında isə aylıq məbləğin daha da yüksələ biləcəyi proqnozlaşdırılıb.
Hesabatda Pentaqon üçün ən böyük alternativ xərclərdən birinin istifadə edilən hava hücumundan müdafiə raketləri olduğu vurğulanıb.
Azalan ehtiyatların ABŞ arsenalını bir neçə il ərzində zəiflədəcəyi bildirilən hesabatda bu çatışmazlığın xüsusilə Çin kimi geniş ballistik və qanadlı raket arsenalına malik ölkələrlə yarana biləcək mümkün böhranlarda ciddi təhlükəsizlik riskləri yarada biləcəyi qeyd olunub.
Hesabatda Hörmüz boğazı və Qırmızı dənizdə daşımaların pozulmasının xam neft, benzin, dizel və aviasiya yanacağının qiymətlərini qlobal miqyasda artırdığına diqqət çəkilib.
Artan enerji və logistika xərclərinin istehlak qiymətlərinə yuxarı istiqamətdə təzyiq göstərdiyi vurğulanan hesabatda 2027-ci ilin ilk rübündə fərdi istehlak xərcləri (PCE) qiymət indeksi üzrə inflyasiyanın əvvəlki proqnozdan 0,5 faiz bəndi, baza PCE inflyasiyasının isə 0,3 faiz bəndi yüksək olmasının gözlənildiyi bildirilib.
Hesabatda qarşıdurmadan qaynaqlanan yüksək inflyasiyanın ABŞ Xəzinədarlığının istiqrazlarının faiz dərəcələrini də artırdığı qeyd olunub.
Diplomatik əməliyyatlar və xarici yardımlar kimi mümkün əlavə xərclərin isə qarşıdurmanın yekun gedişatından asılı olduğu bildirilib. Bu səbəbdən həmin xərclərlə bağlı dəqiq hesablamanın aparılmasının mümkün olmadığı qeyd edilib.
