Ürək sağlamlığı üçün tam taxıllı qidalar tövsiyə olunur: Mütəxəssislər nə məsləhət görür?
“European Heart Journal”da dərc olunan geniş araşdırmaya görə, gündə təxminən 90 qram (üç porsiya) tam taxıl istehlakı ürək və metabolik sağlamlığı dəstəkləyir.
AFN.az xəbər verir ki, gündəlik tam taxıl qəbulunun dörd-altı porsiyaya çatdırılmasının isə daha güclü faydalar verdiyi bildirilir.
Gündə 3-6 porsiya tam taxıl istehlak edən insanlarda ümumi xolesterin, pis xolesterin (LDL), qan təzyiqi, bədən çəkisi və bel çevrəsi də daxil olmaqla, ürək-damar xəstəlikləri riskini artıran təxminən 12 sağlamlıq göstəricisində kiçik, lakin əhəmiyyətli yaxşılaşmalar müşahidə edilib.
Mütəxəssislər yalnız qida rasionuna tam taxıllı məhsullar əlavə etməyin kifayət etmədiyini vurğulayırlar.
Məsələn, ağ undan hazırlanan xəmir məhsulları əvəzinə tam taxıllı undan hazırlanan məhsullara üstünlük verilməsi tövsiyə olunur. Bununla belə, karbohidrat qəbulunu artıraraq çəki artımına səbəb olmamaq üçün balanslaşdırılmış qidalanma rejiminə əməl edilməlidir.
Yulaf əzməsi, qəhvəyi düyü, tam buğda çörəyi, farro, popkorn və kinoa kimi tam taxıllı qidalar lif və qida maddələri ilə zəngin təbii hissələrini qoruyur. Ağ düyü və ağ undan hazırlanan qidalar isə emal prosesində bu faydalı komponentlərdən məhrum edilir.
Mütəxəssislər “çox taxıllı” və ya “tam taxıldan hazırlanıb” etiketləri olan tünd rəngli çörəklərin bir çoxunun tərkibində əsasən rafinə edilmiş un ola biləcəyinə diqqət çəkirlər.
Bu səbəbdən qablaşdırmanın arxasındakı inqrediyentlər siyahısının yoxlanılması və ilk göstərilən inqrediyentin mütləq tam taxıl olması tövsiyə edilir.
