Brexitdən sonra dönüş siqnalı: Britaniyada Aİ-yə qayıdışa dəstək yüksəlib
Böyük Britaniyada aparılan genişmiqyaslı ictimai rəy araşdırması ölkənin Avropa İttifaqına yenidən üzv olmasını dəstəkləyən seçicilərin payının yüksək səviyyəyə çatdığını göstərib.
AFN.az xəbər verir ki, Best for Britain təşkilatının sifarişi ilə YouGov tərəfindən 11 min 927 seçicinin iştirakı ilə keçirilən araşdırmada Böyük Britaniyadakı seçki dairələrinin demək olar ki, hamısında Aİ üzvlüyünün hökumətin Avropa ilə münasibətlərinə dair ən çox dəstəklənən siyasət variantı olduğu müəyyənləşib.
Araşdırmanın nəticələrinə görə, seçicilərin 35 faizi Aİ üzvlüyünü hökumətin ən çox dəstəklədikləri siyasət variantı kimi göstərib. Aİ ilə əlaqələrin daha da zəiflədilməsini istəyənlərin payı isə 11 faiz olub.
Şimali İrlandiya istisna olmaqla, Böyük Britaniyanın 632 parlament seçki dairəsini əhatə edən analizdə Ashfield, Clacton, Great Yarmouth və Boston and Skegness dairələri xaricində Aİ üzvlüyünün bərpası ilk sırada qərarlaşıb.
Yalnız bu dörd seçki dairəsində ən çox verilən cavab qərarsızlıq olub.
Kampaniya iştirakçıları müstəqil iqtisadi araşdırmalara istinad edərək Aİ üzvlüyünün Böyük Britaniya iqtisadiyyatına ən azı 92 milyard funt sterlinq əlavə töhfə verə biləcəyini bildiriblər və nəticələrin Avropaya inteqrasiyanı dəstəkləyən siyasətçilər üçün əhəmiyyətli imkan yaratdığını qeyd ediblər.
Digər tərəfdən, Baş nazir İrlandiyanın Baş naziri Mişel Martinlə görüşündə Böyük Britaniya ilə Avropa İttifaqı arasında daha güclü və yaxın münasibətlərin qurulmasını səbirsizliklə gözlədiyini bildirib.
Ölkənin tanınmış sorğu mütəxəssislərindən professor ser Con Körtis isə Brexit referendumundan sonra Aİ-yə münasibətdə qeydə alınan bu meylin siyasətçilər tərəfindən nəzərə alınmasının vacib olduğunu bildirib.
