Böyük Britaniya və Aİ arasında strateji əməkdaşlıq
Böyük Britaniya və Avropa İttifaqı (Aİ) Brexit-dən sonra ikitərəfli münasibətləri yenidən formalaşdıracaq hərtərəfli əməkdaşlıq razılaşması əldə ediblər.
İngiltərə Baş Nazirlik Ofisindən verilən məlumata görə, təxminən 6 aylıq danışıqlardan sonra əldə edilən razılaşma ilə qida və içki ticarətinə dair yeni sağlamlıq və fitosanitar (SPS) tənzimləməsi qüvvəyə minəcək.
Müddətsiz tətbiq olunacaq bu yeni tənzimləmə, idxal və ixrac zamanı bürokratik əngəlləri azaltmaqla heyvan və bitki məhsulları üzərində rutin nəzarətləri aradan qaldırır və ticarət prosesini sürətləndirir.
Müqaviləyə əsasən, Aİ 2038-ci ilin iyun ayına qədər Böyük Britaniya sularında balıq ovlamaq imkanı əldə edəcək.
Əməkdaşlıq paketinin digər bir hissəsi isə Emissiya Ticarət Sxemlərinin əlaqələndirilməsi ilə bağlıdır. Bu addım AB karbon vergisinin mənfi təsirlərini azaltmaqla yanaşı, İngiltərə iqtisadiyyatına 9 milyard funt sterlinq fayda verəcək.
Yeni razılaşma çərçivəsində həmçinin Britaniyanın polad sənayesi Aİ-nin planlaşdırdığı yeni tariflərdən azad ediləcək.
Bu gün Londonda keçiriləcək Böyük Britaniya–Avropa İttifaqı Sammiti çərçivəsində Təhlükəsizlik və Müdafiə Tərəfdaşlığının da elan ediləcəyi gözlənilir. Bu tərəfdaşlıq Britaniyanın müdafiə sənayesinə Aİ-nin 150 milyard funt sterlinqlik SAFE fonduna çıxış imkanı yaradacaq.
