Britaniyada Hellouin şənliyində beş yeniyetmə bıçaqlanıb
Britaniyada polis Hellouinşənliyində bıçaqlanan beş yeniyetmənin ağır yaralandığını açıqlayıb.
AFN.az xəbər verir ki, şənbə günü saat 22:30-dan az sonra polis əməkdaşları İstli yaxınlığındakı Çandlerz Ford ərazisinin Park yoluna göndəriliblər.
Yaralıların üçü 16, ikisi isə 17 yaşında olub. Onlar xəstəxanaya yerləşdiriliblər.
Hempşir polisi bıçaqlanma hadisələrindən əvvəl kimliyi məlum olmayan bir qrupun Park yolundakı evdə keçirilən məclisə zorla daxil olduğunu ehtimal etdiklərini bildirib.
Polis şahidlərə və hadisə barədə məlumatı olan hər kəsə hüquq-mühafizə orqanları ilə əlaqə saxlamaq çağırışı edib.
Əməkdaşlar araşdırmanı davam etdirərkən bazar günü hadisə yerindəki polis mühasirəsi götürülməyib.
İstintaqa rəhbərlik edən baş müfəttiş Elizabet Piri hadisənin ərazidə yaşayan insanlara təsirindən xəbərdar olduqlarını bildirərək səbir göstərdiklərinə görə sakinlərə təşəkkür edib.
Şahidlərdən biri hadisə yerinə təcili yardım maşınlarının və hava ambulansının gəldiyini bildirib.
Başqa bir şahid hadisənin baş verdiyi evdən qaçan bir nəfərin bıçaqlandığını və iki nəfər tərəfindən təqib edildiyini, həmin şəxsin kömək üçün qışqırdığını gördüyünü danışıb.
İstli dairəsindən deputat Liz Cərvis bazar günü “X” sosial şəbəkəsindəki açıqlamasında zərərçəkənlərin, onların ailələrinin və hadisədən təsirlənən hər kəsin yanında olduğunu bildirib.
Cərvis yerli polisə və təcili yardım xidmətlərinə operativ müdaxiləyə görə təşəkkür edib, eyni zamanda fərziyyələrə yol verilməməsi və təsdiqlənməmiş məlumatların paylaşılmaması barədə xəbərdarlıq edib.
