Tanınmış hərbi veriliş aparıcısı da seçkilərə qatıldı
Daha bir həmkarımız parlament seçkilərində iştirak edəcək.
Uzun illər İctimai TV-də “Salam əsgər” hərbi verilişinin aparıcısı olan və hazırda ATV-nin “Marş irəli” verilişində çalışan İsmayıl Balacanov da 6-cı çağırış Milli Məclisə növbədənkənar seçkilərinə qatılıb.
Jurnalistika fəaliyyətinə “Space” və “AZTV”-dən başlayan və hərbi-vətənpərvərlik verilişlərinin aparıcısı kimi tanınan telejurnalistin namizədliyi 31 saylı Suraxanı ikinci seçki dairəsindən qeydə alınıb.
Qeyd edək ki, İ.Balacanovun hərbi-vətənpərvərlik proqramları cəmiyyətdə həmişə böyük rəğbətlə qarşılanıb. Buna görə də həmkarları arasında böyük nüfuza sahib olan telejurnalist parlament seçkilərinə qatılmaqla ölkənin ictimai-siyasi həyatında daha fəal iştirak etmək qərarına gəlib. Həmkarımız parlamentə vəsiqə qazanacağı təqdirdə media ilə yanaşı hərbi məsələlərin də həlli ilə bağlı təkliflərlə çıxış etməyi planlaşdırır.
Həmkarımıza seçkilərdə uğurlar arzu edirik!
