“İcra başçısının müavini zəng etdi ki, obyekt sökülməlidir” - VİDEO+FOTOLAR
Bakı-Ələt-Astara yolunun üzərində yerləşən yanacaqdoldurma məntəqələrinin və restoranların sökülməsi ilə bağlı məsələ ölkə ictimaiyyəti tərəfindən müzakirə olunur.
Məlumata görə, Baş prokuror yanında Korrupsiyaya Qarşı Mübarizə Baş İdarəsi tərəfindən aparılan araşdırma zamanı obyektlərə dair sənədlərin qanunsuz olduğu ortaya çıxıb və SOCAR yanacaqdoldurma məntəqəsinin, “Lukoil”a məxsus 3 yanacaqdoldurma məntəqəsinin və iki ədəd “Hacıoğlu” restoranı, “Cız-Bız”, “Ulduz”, “Masallı-2”, “Masallı-3”, “İpək yolu” kafelərinin fəaliyyəti bu qurum tərəfindən dayandırılıb və sökülməsi gözlənilir.
“Qafqazinfo”nun əməkdaşları Salyan rayonuna gedərək kafe sahibləri ilə söhbətləşib.
“Masallı” kafesinin sahibi İsrafil Abdullayev saytımıza bildirib ki, obyektinə aid bütün sənədlər qaydasındadır: “Kafe 1994-cü ildən fəaliyyət göstərir. Bir neçə il əvvəl yeni yol istifadəyə veriləndən sonra bir müddət işləmədik. 2020-ci ildə “Azəravtoyol”a müraciət etdik və texniki şərt verildikdən sonra magistral yoldan kafeyə köməkçi yol ayrıldı. Bütün bunlar normativlərə, qanunlara uyğun həyata keçirilib. Obyektin də daşınmaz əmlakın dövlət reyestrindən çıxarışı var. Bütün sənədlər qaydasındadır, hər şey qanun çərçivəsində aparılıb.
Təxminən bir ay əvvəl Salyan rayon İcra Hakimiyyətinin birinci müavini Etibar Hüseynov zəng edib dedi ki, əsas yola bitişik yol bağlanmalıdır, obyekt də sökülməlidir. Mən də etirazımı bildirdim ki, mənim “kupça”m var, “Azəravtoyol”un verdiyi texniki şərtim var. İki gün əvvəl də gəlib yolu qazdılar, magistraldan ayırdılar. Hələ ki, söküntü ilə bağlı bir söz deyilməyib.
Bir ay əvvəl Korrupsiyaya Qarşı Mübarizə Baş İdarəsindən gəlib sənədlərimizi istədilər, hər bir sənədi təqdim etdim, araşdırdılar. Sonra dedilər hər şey qaydasındadır, yaxşı yol, işinizdə olun. Mən pandemiya zamanı əlavə təmir işləri gördüm, yolun çəkilməsinə xərcim çıxdı. Biz də pandemiyadan sonrakı dövrə hazırlaşırdıq. Amma indi heç kim demir ki, buna görə kompensasiya veriləcək, ya yox. Kimsə çıxıb desin ki, gedin sakit oturun, biz də işimizi bilək. Ümumiyyətlə, biz bilmirik ki, bu qərarı hansı təşkilat verib. Bunu bilsək, gedib dərdimizi də onlara deyərdik”.
SOCAR-ın İctimaiyyətlə əlaqələr və tədbirlərin təşkili idarəsinin rəis müavini İbrahim Əhmədov “Qafqazinfo”ya açıqlamasında bildirib ki, sözügedən yanacaqdoldurma məntəqəsi müqavilə ilə SOCAR brendindən istifadə etməklə fəaliyyət göstərib: “Bu yanacaqdoldurma məntəqəsi franşiza əsasında, yəni SOCAR-ın brendindən istifadə barədə müqaviləyə əsasən fəaliyyət göstərib. Belə ki, məntəqənin özü SOCAR-a məxsus olmayıb. Franşiza sazişində qarşı tərəf olan sahibkar həmin müqavilənin dayandırılması ilə bağlı bildiriş verib”.
“Ulduz”kafesinin administratoru Həsrət Salayev də saytımıza deyib ki, onlara da fəaliyyətlərini dayandırmaq və obyekti sökmək barədə göstəriş verilib: “Bir neçə gündür söküntüyə başlamışıq, indi hava şəraitinə görə fasilə vermişik”. H.Salayev bu barədə ətraflı danışmaq istəməyib.
Salyan rayon İcra Hakimiyyətinin rəsmiləri isə obyektlərin sökülməsinin səbəbi barədə açıqlama verməkdən imtina ediblər.
