Tramp seçilərsə, İlon Mask hökumətdə yer alacaq
![](/uploads/posts/2024-09/mask-ve-tramp.jpg)
ABŞ-ın keçmiş prezidenti Donald Tramp 2024-cü il seçkilərində yenidən seçiləcəyi təqdirdə texnologiya milyarderi İlon Maskı vəzifəyə təyin edəcəyini açıqlayıb.
O, bildirib ki, Maskın təklif etdiyi planla trilyonlarla dollarlıq hökumət israfını aradan qaldırmağı hədəfləyir.
Nyu-Yorkda işgüzar görüşdə çıxış edən Tramp bəyan edib ki, Musk ikinci Tramp administrasiyasında federal hökumətin maliyyə və fəaliyyətinə nəzarətdən məsul olacaq.
“Bu komissiyanın ilk vəzifəsi altı ay ərzində saxtakarlığın və yanlış ödənişlərin tamamilə aradan qaldırılması üçün fəaliyyət planı hazırlamaq olacaq”, - deyə o bildirib.
Tramp həmçinin ABŞ-ı kriptovalyuta mərkəzinə çevirməyi, idxal olunan məhsullara vergiləri artırmağı və Bayden administrasiyasının iqlim və inflyasiya qanununu ləğv etməyi vəd edib.
İlon Mask isə X sosial media platformasındakı paylaşımında: "Amerikaya xidmət etməyi səbirsizliklə gözləyirəm. Maaş, titul və ya təqdir gözləmirəm" - deyə qeyd edib.
Görüşdə Tramp həmçinin F-35 qırıcılarının bütün hissələrinin ABŞ-da istehsal olunmasının vacibliyini vurğulayaraq, milli təhlükəsizlik məsələlərinə diqqət çəkib.