TikTok: ABŞ-ın qadağası ifadə azadlığına böyük təsir göstərəcək
"TikTok" "ByteDance" tərəfindən satılmadığı təqdirdə ABŞ-da qadağan edilməsinə səbəb olacaq bir qanunun istifadəçilərin ifadə azadlığına böyük təsir edəcəyini iddia edib.
Qanun ABŞ istifadəçilərinin məlumatlarının Çin hökuməti tərəfindən istifadə oluna biləcəyi ilə bağlı narahatlıqlar səbəbindən gündəmə gətirilib.
"TikTok" və "ByteDance" dəfələrlə Çin hökuməti ilə heç bir əlaqəsinin olmadığını bildirib.
Şirkətlər mayın əvvəlində qanunun konstitusiyaya zidd olduğunu və ABŞ-da 170 milyon "TikTok" istifadəçisinin ifadə azadlığına mane olduğunu əsas gətirərək bu qanunu dayandırmaq üçün məhkəməyə müraciət ediblər.
Vaşinqtondakı apellyasiya məhkəməsinin üç hakimdən ibarət heyəti bazar ertəsi "TikTok"un etirazlarını dinləyib.
"TikTok"un vəkili Andryu Pinkus qanunun qeyri-müəyyən gələcək risklərə əsaslanaraq ifadə üçün fövqəladə məhdudiyyət tətbiq etdiyini müdafiə edib.
ABŞ hökuməti isə "TikTok"un Çin dövləti tərəfindən idarə oluna biləcəyindən narahatlığını ifadə edir.
ABŞ Ədliyyə Nazirliyinin hüquqşünası Daniel Tenni "TikTok"un ABŞ-da məlumatların idarə edilməsi arqumentini rədd edərək, platformanın arxasındakı kodun "ByteDance" tərəfindən yazıldığını və idarə olunduğunu söyləyib.
"TikTok" bu vəziyyəti riyakarlıq kimi qiymətləndirərək, siyasətçilərin platformadan istifadəsinin 2024-cü il prezident seçkiləri yaxınlaşdıqca təhlükəsizlik narahatlıqlarına zidd olduğunu müdafiə edib.
Mütəxəssislər işin ABŞ Ali Məhkəməsinə qədər və aylarla uzana biləcəyini proqnozlaşdırırlar.
Mənbə: BBC
