Starlink peyki orbitdə partladı
SpaceX orbitdəki Starlink peyklərindən birinin partladığını və iş funksiyasını itirən cihazın Dünya atmosferinə daxil olmaq üzrə alçaldığını təsdiqləyib.
Son günlər partlayışın Çinə aid bir peyklə toqquşmadan qaynaqlandığı barədə fərziyyələr yayılmışdı.
Bu iddialar hər iki peykin orbitdə bir-birinə çox yaxınlaşdığına dair hesabatların ortaya çıxmasından sonra gündəmə gəlmişdi. Lakin SpaceX bildirib ki, hadisə heç bir xarici müdaxilə və ya toqquşma nəticəsində baş verməyib, peykin öz sistemində yaranan texniki nasazlıq səbəb olub.
Texniki nasazlıq partlayışa səbəb oldu
Starlink-in rəsmi sosial media hesabında açıqlanıb ki, 17 dekabr tarixində 35956 nömrəli peykdədə anomaliya baş verib və 418 kilometr hündürlükdə cihazla əlaqə kəsilib.
Nasazlıq nəticəsində hərəkətverici çəndə sızma baş verib və peykin orbiti saatda təxminən 4 kilometr sürətlə aşağı düşüb.
Şirkət qeyd edib ki, partlayış sonrası yaranan kiçik parçalar izlənilə bilir və onların zəif sürətləri səbəbindən aşağı orbitdəki digər peyklər və obyektlər üçün təhlükə yaratmır.
Buna baxmayaraq, bu hadisə son illərdə alimlərin və tədqiqatçıların tez-tez qeyd etdiyi kosmik tullantı problemlərinə dair narahatlıqları yenidən gündəmə gətirib.
SpaceX orbitdə üzən bu parçaları izləmək üçün NASA və ABŞ Kosmik Qüvvələri ilə koordinasiyada işlədiyini açıqlayıb.
Dünyaya giriş prosesi təhlükəsizdir?
İş funksiyasını itirmiş peykin hazırda nəzarətsiz şəkildə endiyi və qarşıdakı həftələrdə Dünya atmosferinə daxil olmasının gözlənildiyi bildirilib.
SpaceX peykin böyük ölçüdə vahid parça olduğunu, lakin atmosferə daxil olduqda tamamilə yanaraq yox olacağını vurğulayıb.
Hazırkı trayektoriyasının Beynəlxalq Kosmik Stansiyanın altından keçəcəyi və buna görə stansiya və ekipaj üçün heç bir risk yaratmadığı qeyd olunub.
Şirkət yenidən girişin dəqiq vaxtını açıqlamasa da, peykin yer səthinə düşmədən atmosferdə tamamilə məhv olacağına dair ictimaiyyətə zəmanət verib.
Daha əvvəl də Starlink peyklərinin digər şirkətlərə aid cihazlarla toqquşma təhlükəsi yaşadığı bildirilmiş, lakin indiyədək heç bir fiziki kontakt baş verməmişdi.
