Dünyanın ən kiçik avtomobili hərraca çıxarılır
Ginnesin Rekordlar Kitabı tərəfindən rəsmi olaraq dünyanın ən kiçik seriyalı istehsal avtomobili elan edilən zeytun yaşılı rəngli Peel P50 noyabrın 14-də hərraca çıxarılacaq.
AFN.az xəbər verir ki, İngiltərənin Uorvikşir bölgəsində yerləşən Iconic Auctioneers şirkəti tərəfindən satışa çıxarılacaq üçtəkərli mikroavtomobilin 40 min-60 min funt-sterlinq arasında qiymətə alıcı tapacağı gözlənilir. Men adasında istehsal olunan avtomobil yalnız bir böyük insanı və bir alış-veriş çantasını daşımaq üçün hazırlanıb.
Təxminən 137 santimetr uzunluğunda və 106 santimetr enində olan avtomobil diqqətçəkən ölçüləri ilə seçilir.
Avtomobil 1964-cü ildə Peel Engineering şirkəti tərəfindən Men adasında istehsal edilib. Bazara çıxarıldığı dövrdə 199 funt-sterlinq qiymət etiketi daşıyan avtomobilin həmin məbləği bu gün təxminən 3 min 635 funt-sterlinqə bərabərdir. Maksimal sürəti saatda təxminən 64 kilometr olan avtomobil şəhər nəqliyyatı üçün nəzərdə tutulmuşdu. Geri ötürməsi olmayan avtomobili arxaya hərəkət etdirmək üçün sürücü arxa hissədəki tutacaqdan tutaraq avtomobilin arxa tərəfini qaldırmalı və onu əllə çevirməlidir.
Yanacağa qənaət etməsi səbəbindən bazara çıxarıldığı dövrdə daha ucuz başa gəlir şüarı ilə təqdim olunan Peel P50 2010-cu ildə Ginnesin Rekordlar Kitabına dünyanın ən kiçik seriyalı istehsal avtomobili kimi daxil edilib. İstehsal olunduğu dövrdə geniş kütlələr arasında populyarlıq qazana bilməyən modeldən 1962-1965-ci illər arasında cəmi 50 ədəd istehsal edilib. Hazırda bu avtomobillərdən 30-dan azının qorunub saxlandığı və kolleksiyaçılar tərəfindən böyük maraq gördüyü bildirilir.
Hərraca çıxarılan zeytun yaşılı avtomobil 1964-cü ildə yeni vəziyyətdə Finlandiyaya idxal edilib və bu ilin əvvəlinədək həmin ölkədə saxlanılıb. Iconic Auctioneers nümayəndələri avtomobilin orijinal vəziyyətini qoruduğunu və bərpa işləri üçün kifayət qədər münasib durumda olduğunu bildiriblər.
Şirkətin qurucusu Cyril Cannell tərəfindən layihələndirilən Peel P50 ilk dəfə 1962-ci ildə Earl's Court Velosiped və Motosiklet Sərgisində təqdim olunub. İstehsal prosesi zamanı əvvəlcə ön hissədə bir, arxa hissədə iki təkərdən ibarət olan quruluş dəyişdirilərək ön tərəfdə iki, arxa tərəfdə isə bir təkər yerləşdirilməsi qərara alınıb. 49 kubsantimetrlik ikitaktlı mühərriklə təchiz edilən və üçpilləli mexaniki sürətlər qutusuna malik avtomobil 1963-cü ildə satışa çıxarılıb.
Iconic Auctioneers şirkətinin avtomobil eksperti Alex Lucocq Peel P50-nin avtomobil həvəskarları və kolleksiyaçılar üçün xüsusi əhəmiyyət daşıdığını bildirib. Modelin son 20 ildə kult statusu qazandığını vurğulayan Lucocq avtomobilin 1960-cı illərin əvvəllərində Britaniya avtomobil sənayesinin yaradıcılığını və orijinallığını təmsil etdiyini qeyd edib.
Lucocq bildirib ki, dünyada cəmi 30-a yaxın nümunəsinin qalması və nadir hallarda satışa çıxarılması səbəbindən orijinal Peel P50 bu gün həmin dövrün bir çox Britaniya idman avtomobilindən daha yüksək qiymətləndirilir. Hərrac noyabrın 14-də keçiriləcək.
