Üçüncü dünya müharibəsi olmayacaq - Zelenski
Ukrayna Prezidenti Vladimir Zelenski “Qızıl Qlobus” film mükafatının tamaşaçılarına müraciət edib.
AFN.az xəbər verir ki, Zelenski müraciətində "Üçüncü dünya müharibəsi olmayacaq, bu trilogiya deyil. Ukrayna Rusiyanın torpaqlarımıza təcavüzünü dayandıracaq" - deyə vurğulayıb.
Ukrayna prezidentini aktyor və rejissor Şon Penn təqdim edib. O, ötən ilin noyabrında Kiyevdə Zelenski ilə görüşüb və Ukrayna haqqında sənədli film çəkib.
“Üsyanda olan gənc iranlıların cəsarətindən tutmuş Əfqanıstanın davamlı qadın hərəkatına qədər, bizə aydın şəkildə xatırladılır ki, xəyal etmək azadlığı sadəcə bir insan lüksü deyil, əksinə, onun uğrunda mübarizə aparılmalı olan insan ehtiyacıdır. Mən bu gecə ən açıq nizə ucluğunu təmsil edən bir insanı təmsil etməkdən qürur duyuram" - deyə məşhur aktyor bildirib.
Daha sonra Zelenski tamaşaçılara videomüraciətində 1944-cü ildə baş tutan ilk "Qızıl Qlobus" mükafatlandırmasını xatırladıb. "İkinci Dünya Müharibəsi hələ bitməmişdi, amma vəziyyət dəyişmişdi, hamı kimin qalib gələcəyini bilirdi. Qarşıda hələ döyüşlər və göz yaşları var idi, o zaman "Qızıl Qlobus" mükafatı 1943-cü ilin ən yaxşı ifaçılarına layiq görüldü... İndi 2023-cü ildir, Ukraynada müharibə hələ bitməyib, amma vəziyyət dəyişir”, - deyə o bildirib.
Zelenski vurğulayıb ki, bu müharibədə kimin qalib gələcəyi artıq bəllidir. "Hələ döyüşlər və göz yaşları var, amma indi mən dəqiq deyə bilərəm ki, keçən ilin ən yaxşısı sizsiniz. Azad dünyanın azad insanları. Bizim azadlıq uğrunda ümumi mübarizəmizdə azad Ukrayna xalqını dəstəkləmək ətrafında birləşənlər" - deyən Zelenskinin Ukraynanın qələbəsi ilə bağlı proqnozunu tamaşaçılar alqışlayıblar.
