İspaniya hökuməti Kataloniyada müstəqillik elan etmək cəhdinin qarşısını almaq qərarına gəlib
İspaniyadakı solçu koalisiya hökuməti fevralda Kataloniya muxtar hökuməti parlamentinə vətəndaş təşəbbüsü olaraq təqdim edilən və Kataloniyanın İspaniyadan ayrılaraq müstəqilliyini elan etməsini nəzərdə tutan qərarın qəbulunun qarşısını almaq üçün hərəkətə keçib.
Nazirlər Şurasının bugünkü iclasında qəbul edilən qərarla bağlı mətbuata məlumat verən ədliyyə naziri Feliks Bolanos, fevralın 20-də Kataloniyanın müstəqilliyini elan etməsi ilə bağlı təqdim edilən və hökumət tərəfindən qəbul edilən vəsatətin dayandırılması üçün Konstitusiya Məhkəməsinə müraciət ediləcəyini açıqlayıb.
Təşəbbüsün qanuni fəaliyyətinin Konstitusiya Məhkəməsinə edilən müraciətlə avtomatik olaraq dayandırılacağını ifadə edən Bolanos, "Konstitusiya Məhkəməsinə etdiyimiz müraciət hökumətin siyasətlərinə uyğundur" açıqlamasını verib.
Separatçı, cəmiyyəti parçalayan və gərginlik yaradan hər hansı təşəbbüsü rədd etdiklərini vurğulayan Bolanos, “Nə hökumət, nə də Sosialist İşçi Partiyası Kataloniyanın İspaniyadan və Avropa İttifaqından kənarda qalmasını istəmir. Əksinə, Kataloniyanın İspaniya və Avropanın əhəmiyyətli və əsas bir hissəsi olmasını istəyirik" ifadələrini işlədib.
Ədliyyə naziri iddia edib ki, İspaniya Konstitusiyası ilə müəyyən edilmiş hazırkı Kataloniya özünüidarə statusu Kataloniyada birgəyaşayışın ən yaxşı təminatıdır.
