Meksikada ABŞ və Avstraliyadan olan turistlərin cəsədləri quyudan tapılıb
Meksikanın Aşağı Kaliforniya ştatında quyunun dibində tapılan güllə yaraları olan cəsədlər ABŞ və Avstraliyadan itkin düşmüş turistlərə məxsusdur.
Bu barədə ştatın qubernatoru Marina del Pilar öz X səhifəsində məlumat verib.
Aşağı Kaliforniya Baş Prokurorluğu bildirib ki, itkin düşən əcnəbi vətəndaşların ailələri Ensenada şəhərinin cənubunda tapılan qurbanların şəxsiyyətini təsdiqləyib.
Qeyd edək ki, bundan əvvəl Aşağı Kaliforniyanın prokuroru Mariya Yelena Andrade Avstraliyadan olan sörfçülər Ceyk və Kallum Robinsonun, eləcə də ştatda istirahət edən ABŞ vətəndaşı Cek Karter Roudun öldüyünü açıqlamışdı. İdmançılar sonuncu dəfə aprelin 27-də görünüblər. O, qətlin əldən çıxan quldurluğun nəticəsi olduğunu söyləyib: "Oğurluğun nəzarətdən çıxdığını görüb, cəsədləri quyuya ataraq məhv etməyə çalışıblar".
“El Universal”ın prokurora istinadən verdiyi məlumata görə, xarici turistlər çadır şəhərciyində olub, avtomobillərini oğurlamaq məqsədilə quldurların hücumuna məruz qalıblar. İdmançılar müqavimət göstərib, bundan sonra hücum edənlər silahları çıxarıb və atəş açıblar.
Hüquq-mühafizə orqanları qətldə şübhəli bilinən üç nəfəri saxlayıb.
