“Billur Firması”na qeyri-qanuni işçi çalışdırdığına görə 20 min manat cərimə
“Billur Firması” işçini qeyri-qanuni işlədib – 20 min manat cərimə olundu
Tovuzda fəaliyyət göstərən “Billur Firması” MMC tərəfindən əmək hüquqlarının pozulması faktı ilə bağlı aparılmış araşdırma nəticəsində ciddi qanun pozuntusu aşkarlanıb.
Qafqazinfo-nun Baş Prokurorluğa istinadla verdiyi xəbərə görə, şirkət Tovuz rayonunda yerləşən “Billur Petrol” yanacaqdoldurma məntəqəsində bir şəxsi əmək müqaviləsi olmadan – yəni qanunsuz şəkildə operator vəzifəsində işlədib.
Araşdırma nəticəsində Tovuz Rayon Prokurorluğu tərəfindən İnzibati Xətalar Məcəlləsinin 192.1-ci maddəsi (əmək müqaviləsi olmadan işə cəlbetmə) ilə inzibati icraat başlanıb. İş baxılması üçün rayon məhkəməsinə göndərilib və məhkəmənin qərarı ilə hüquqi şəxs – “Billur Firması” 20 min manat məbləğində cərimələnib.
Bundan əlavə, şirkətin direktoru Dəmirov İlham Kamıl oğlu barəsində də eyni maddə üzrə inzibati icraat başlanaraq məsələ baxılması üçün Dövlət Əmək Müfəttişliyi Xidmətinin Qazax-Tovuz regional şöbəsinə göndərilib. Mütəxəssislərin araşdırması nəticəsində vəzifəli şəxs 3 min manat cərimə olunub.
Qeyd edək ki, əmək müqaviləsi olmadan işçi çalışdırmaq qanunvericiliklə ciddi şəkildə qadağandır və bu hallar aşkarlandıqda həm hüquqi, həm də fiziki şəxslər məsuliyyətə cəlb olunur.
