Venesuela: ABŞ-ın “narkotik yüklü” gəmiyə hücum videosu uydurmadır
Venesuelanın Daxili İşlər, Ədalət və Sülh naziri Diosdado Kabello ABŞ Prezidenti Donald Trampın paylaşdığı “narkotik yüklü gəmiyə hücum” videosunun uydurma olduğunu bildirib.
VTV dövlət televiziyasına danışan Kabello deyib ki, Karib dənizində Venesuelanın sahilləri yaxınlığında bir gəmidə baş verən hücumla bağlı görüntülər gerçək deyil.
Kabello bildirib ki, paylaşılmış video süni intellektlə hazırlanmış saxta məzmundur və Vaşinqton hakimiyyəti bunu “narkotik qaçaqmalçılarına qarşı əməliyyat” kimi göstərərək ictimaiyyəti manipulyasiya etməyə çalışır.
ABŞ-ın Venesueladan ayrılan və narkotik yüklü olduğunu iddia etdiyi gəmidə baş verən hücumla bağlı videoya diqqət çəkən Kabello deyib: “ABŞ-ın son uydurması budur. ABŞ yalanlarla Bolivarçı inqilabdan qurtulmaq istəyir. Ağ Ev hərbi müdaxiləni haqlı göstərmək üçün narkotik qaçaqmalçılığı arqumentindən istifadə edir.”
Narkotik yüklü gəmi hücumunda 11 nəfərin öldüyü xəbərinə toxunan Kabello bildirib: “11 nəfəri öldürdüklərini qürurla elan edirlər. Bu çox həssas mövzudur. Bəs müdafiə hüququ? Bəzi məqamlar açıq deyil. Şübhələr ortaya çıxmağa başlayıb, amma cavablar hələ görünmür.”
Eyni zamanda Kabello qeyd edib ki, milli Bolivarçı milis qüvvəsinə könüllü qeydiyyatdan keçənlər üçün təlim proqramları başlanacaq. Milislər üçün hərbi təlimlərin də keçiriləcəyini vurğulayan Kabello bildirib: “Burada milli birlik vətənimizin müdafiəsində vacibdir. Qardaşlarımız vətəni müdafiə edərkən ön sıralarda yer alıblar və biz də oradayıq.”
