Avropa müdafiə startapları rekord vurdu: 8,7 milyard dollar
Avropada müdafiə, təhlükəsizlik və davamlılıq sahəsində fəaliyyət göstərən startaplara edilən investisiyalar 2025-ci ildə rekord həddə çataraq ümumilikdə 8,7 milyard dollara yüksəlib.
Startap ekosistemi üzrə məlumatlar təqdim edən "Dealroom" araşdırma mərkəzi və NATO tərəfindən təsis edilən NATO İnnovasiya Fondunun (NATO Innovation Fund) birgə hesabatına görə, 2025-ci ildə bu sahədə çalışan şirkətlərin cəlb etdiyi vəsait ötən illə müqayisədə 55% artıb.
İnvestisiya artımının əsas drayverləri
Hesabata görə, artımda xüsusilə irimiqyaslı investisiya müqavilələri həlledici rol oynayıb. Bu növ böyük həcmli investisiyaların cəmi 4,7 milyard dollara çataraq əvvəlki illərlə müqayisədə ciddi sıçrayış nümayiş etdirib.
Lider ölkələr: 2025-ci ildə ən çox investisiya cəlb edən ölkə Böyük Britaniya olub. Almaniya isə ikinci pillədə qərarlaşaraq son illərdəki böyümə dinamikasını qoruyub.
Regional inkişaf: Mərkəzi və Şərqi Avropa investisiya sayındakı artım tempi ilə ən sürətlə böyüyən region kimi qeydə alınıb.
Önə çıxan şəhərlər: Münhen müdafiə və təhlükəsizlik texnologiyaları sahəsində Avropanın ən böyük investisiya mərkəzi statusunu saxlayır. Sofiya və Oslo da investisiya artımı ilə diqqət çəkən şəhərlər sırasındadır.
Strateji mühit və NATO-nun rolu
Avropada dəyişən təhlükəsizlik mühiti və artan müdafiə xərcləri bu sahədəki texnoloji investisiyaları sürətləndirən əsas amildir. Xatırladaq ki, NATO müttəfiqləri 2025-ci ildə Niderlandın Haaqa şəhərində keçirilən NATO Sammitində müdafiə potensialının gücləndirilməsi və innovasiyaların dəstəklənməsi istiqamətində əməkdaşlığı artırmaq barədə mühüm qərarlar qəbul ediblər.
Almaniya və Niderlandda vençur kapitalı investisiyalarının əhəmiyyətli hissəsi məhz bu sahədəki şirkətlərə yönəldilməkdədir.
