Brent neftinin bir barreli 86,61 dollardan satılır
Brent neftinin bir barreli beynəlxalq fyuçers bazarlarında 86,61 dollardan satılır.
AFN.az xəbər verir ki, cümə günü 94,49 dollara qədər yüksələn Brent neftinin fyuçers qiyməti günü 91,68 dollardan tamamlayıb.
Brent neftinin bir barrelinin qiyməti bu gün saat 10:38 etibarilə əvvəlki bağlanışla müqayisədə təxminən 5,5 faiz azalaraq 86,61 dollar olub. Eyni dəqiqələrdə Qərbi Texas tipli (WTI) xam neftin bir barreli də 83,85 dollardan alıcı tapıb.
Neft qiymətləri ABŞ ilə İran arasında gərginliyin səngiyəcəyinə dair siqnalların Yaxın Şərq mənşəli tədarük narahatlıqlarını azaltması və bazarlarda formalaşan müharibə riski ehtimalının aradan qalxması ilə həftənin ilk ticarət günündə kəskin geriləyib.
Brent nefti ötən həftə toqquşmaların Hörmüz boğazından kənara çıxaraq Qırmızı dənizə yayılması və Yaxın Şərqdən xam neft ixracının pozula biləcəyi ilə bağlı narahatlıqlar səbəbindən qısa müddətə bir barrel üçün 100 dollar səviyyəsini test etmişdi.
Qiymətlərdəki enişə ABŞ-ın İrana qarşı hava hücumlarına 13 gündən sonra fasilə verdiyini açıqlaması təsir edib. Vaşinqton diplomatik təşəbbüslərə vaxt vermək məqsədilə əməliyyatları dayandırdığını bildirib.
Bazarlarda həmçinin Çinin Vaşinqton ilə Tehran arasında yenidən diplomatik təmasların qurulmasına yönəlmiş təşəbbüslər göstərdiyinə dair xəbərlər də nikbinliyi dəstəkləyib.
Analitiklər təxminən 2 həftədir davam edən toqquşmalardan sonra bazarın gərginliyin azalmasına dair hər bir siqnalı sürətlə qiymətlərə daxil etdiyini bildirirlər. Bununla belə, ABŞ-ın hücumları niyə dayandırdığı ilə bağlı dəqiq açıqlama verilmədiyinə diqqət çəkən analitiklər mövcud atəşkəs görüntüsünün qalıcı olduğuna dair qəti nəticəyə gəlmək üçün hələ tez olduğunu ifadə edirlər.
Digər tərəfdən, geosiyasi gərginliyin azalmasına baxmayaraq, tədarük riskləri tamamilə aradan qalxmayıb. Həftə sonu Hörmüz boğazından keçən əmtəə gəmilərinin sayı azalarkən, Husilərin Səudiyyə Ərəbistanındakı neft obyektlərinə hücumlarından sonra Babülməndəb boğazındakı dəniz nəqliyyatında da yavaşlama müşahidə edilib.
Ekspertlər indiyədək tədarük kəsintilərinin Çinin daha az xam neft idxal etməsi, fövqəladə ehtiyatlardan istifadə olunması və Səudiyyə Ərəbistanının Hörmüz boğazından yan keçən alternativ ixrac marşrutları sayəsində tarazlandığını bildirirlər. Lakin strateji ehtiyatların azalması, kommersiya ehtiyatlarının məhdudlaşması və Hörmüz ilə Babülməndəb boğazlarındakı risklərin davam etməsi səbəbindən regionda baş verə biləcək yeni tədarük problemlərinin neft qiymətlərinə yenidən yuxarı istiqamətdə dəstək verə biləcəyi qiymətləndirilir.
Eyni zamanda, ABŞ Enerji İnformasiya Administrasiyasının (EIA) 2026-cı ilin iyul ayında yayımladığı Qısamüddətli Enerji Görünüşü hesabatında qlobal neft istehlakının 2026-cı ildə gündəlik orta hesabla 1,2 milyon barrel azalacağının proqnozlaşdırılması da qiymətlərə aşağı istiqamətli təzyiqi artıran amillər arasında yer alıb.
Brent neftində texniki baxımdan 87,58 dolların müqavimət, 86,68 dolların isə dəstək zonası kimi izlənə biləcəyi bildirilir.
