“Batuhan A” gəmisinin ekipajının axtarışları davam edir
Bursansanın Karacabey rayonu sahillərində batan “Batuhan A” yük gəmisinin itkin düşən 4 ekipaj üzvünün axtarış-xilasetmə işləri 8-ci gündə davam edir.
Bursa valisi Mahmud Dəmirtaşın verdiyi açıqlamada, axtarışların 8-ci günündə 660 personal ilə hava və quru sahəsinin araşdırılması və dəniz axtarış-xilasetmə işlərinin davam etdiyini bildirib.
"Batuhan A"nın 6 nəfərlik heyətindən Zeynep Kılınç və Hüseyn Tutukun cansız cəsədləri gəminin qalıqları arasında tapıldıqdan sonra itkin düşən 4 nəfər üçün aparılan işlərdə dalışların koordinasiyası təmin edilib. 51 metr dərinlikdə dibdə oturan gəminin üzərində dayanan “Nənə Hatun” gəmisindəki zabitlər İnsansız Sualtı Robot (ROV) ilə görüntüləmə və skan etməyə davam edir.
Dəniz Qüvvələri Komandanlığı, Sahil Mühafizə Komandanlığı, Sahil Polis Baş İdarəsi, Təhlükəsizlik Baş İdarəsi, Jandarma Baş Komandanlığı, Türk Silahlı Qüvvələri (TSK) Sualtı Müdafiə (SAS) komandoları və AFAD qrupları hava, dəniz səthi və qurudan axtarış əməliyyatları həyata keçirir.
Fevralın 14-də saat 20.30-da 6 nəfərlik heyət və 1250 ton mərmər tozu yükü ilə Balıkəsirdə Mərmərə adasından Bursanın Gemlik rayonundakı Roda Limanına hərəkət edən "Batuhan A" adlı 69 metr uzunluğundakı yük gəmisi pis hava şəraitindən zərər görüb və fevralın 15-i saat 06.20 radələrində Karacabey rayonu sahillərində sahildən 4 mil aralıda batıb. Gəmidə aşpaz işləyən 33 yaşlı Zeynep Kılınçın cansız cəsədi fevralın 17-də Hərbi Dəniz Qüvvələri Komandanlığına bağlı dalğıclar tərəfindən həyata keçirilən iki dalış zamanı tapılıb. Fevralın 20-də SAS komando dalğıcları tərəfindən Hüseyn Tutukun da cəsədi tapılıb.
