Rusiya Çinə elektrik enerjisi tədarükünün artırılmasını müzakirə edib
Rusiya və Çin Uzaq Şərqdə artan istehlakı nəzərə alaraq Çinə elektrik enerjisi tədarükünün artırılması imkanlarını müzakirə ediblər.
Bu barədə Rusiya Federasiyası Energetika Nazirliyinin elektrik enerjisi və bərpa olunan enerji mənbələri sahəsində əməkdaşlıq üzrə Rusiya-Çin işçi qrupunun iclasının yekunlarına dair məlumatında deyilir.
Elektrik enerjisi ticarəti məsələlərinə əlavə olaraq, görüş zamanı iştirakçılar qarşıdan gələn Rusiya-Çin hökumətlərarası komissiyasına hazırlıq, eləcə də elektrik enerjisinin mənşəyinə dair sertifikatlaşdırma sistemlərinin – “yaşıl” sertifikatların tanınması məsələlərini müzakirə ediblər.
“Rusiya və Çində elektrik enerjisinin mənşəyinə dair “yaşıl” sertifikatların verilməsi və tətbiqi prosesinin təşkili ölkələrimiz arasında elektrik enerjisi sertifikatlaşdırma sistemlərinin daha da qarşılıqlı tanınmasına kömək edəcək”, - deyə Rusiya Energetika Nazirliyinin məlumatında bildirilir.
2023-cü ilin sonunda Rusiyada elektrik enerjisinin ixrac-idxalının yeganə operatoru olan İnter RAO Çinə tədarük həcmini bir il əvvəlki rekord 4,6 milyard kilovatsaatdan 3,1 milyard kilovatsaata qədər azaldıb. Təchizatlara Uzaq Şərqdə suyun az olması, istehsal avadanlıqlarının yüksək qəza nisbətləri və enerji sistemində artan enerji istehlakı səbəbindən keçən ilin ikinci yarısında Sistem Operatoru tərəfindən qoyulmuş məhdudiyyətlər təsir göstərib.
