55 saylı marşrut sərnişinləri yarıyolda düşürdü - ŞİKAYƏT
Sabunçudan Yeni Günəşli qəsəbəsinə gedən 55 saylı marşrutun, deyəsən, sahibi yoxdur. Bu marşrutu hansı qaydalarla idarə olunur, anlamaq çətindir. Marşrut sanki "avtopilot"da işləyir.
AFN.az xəbər verir ki, bunu jurnalist Həbibə Abdulla deyib. Onun sözlərinə görə, mütəmadi istifadə etdikləri 55 saylı marşrutun sürücüləri istədikləri vaxt, istədikləri yerdə yollarını dəyişir, yaxud sərnişinlərə "maşın xarab oldu, düşün özünüz gedin" deyə bilirlər: "Bu zaman onlar heç bir etiraz-filan da dinləmək istəmirlər, səsini çıxaranı, az qalırlar döyələr. Siz hələ 55-lərin ötüşməyini görəsiz, içərisindəki uşaqların necə qorxduğunu görüb, bir neçə dəfə irad bildirmişəm, amma çifayda.
Bu gün də səhər uşağı təhsil aldığı məktəbə qoyub Qaraçuxurdan Sabunçuya qayıdanda Bakıxanov ərazisindəki qazıntı işlərinə görə marşrut yolunu dəyişdi. Halbki digərləri nisbətən sıxlıq da olsa, öz yolları ilə davam edirdilər. Sürücü yol boyu digər sürücülərə zəng edirdi ki, çıxmayın, yollar bağlıdır. Qaraçuxur ərazisində avtobusu yolun kənarına verib saxladı və dedi ki, xarab oldu, düşün gedin. "Başqa maşın gələcəkmi" deyə soruşduq, dedi zəng edirəm cavab vermir. Tanımadığım yollarda (yuxarıda qeyd etdiyim kimi, marşrut yolunu dəyişmişdi, başqa yolla hərəkət edirdi) qaldığım üçün soruşa-soruşa xeyli yolu piyada getdikdən sonra gəlib 55 saylı marşrutun ənənəvi yoluna çıxdım. Amma nə qədər gözləsəm də, 55 gəlmədi. Naəlac qalıb başqa bir avtobusa mindim və yaşadığım əraziyə işləyən marşrutların dayanacağına getdim. Beləliklə, getməli olduğum ünvana çatmaq üçün növbəti marşrutdan istifadə etdim. Yeri gəlmişkən, bunun üçün mənim kartımda lazımi vəsait də yox idi, marketlərdən birində ödəniş terminalı tapıb kartıma pul vurduqdan sonra yola düşə bilmişəm".
H.Abdullanın sözlərinə görə, 55 saylı marşrutun sahibkarını tapmağa çalışsa da, nail ola bilməyib: "Sürücüdən soruşdum demədi, internetdə axtarış verdim, Rövşən Salamov adlı bir adamın adı çıxdı, amma əlaqə nömrəsi yoxdur. Məlum oldu ki, marşrutlar və onların sahibləri haqda heç bir açıq mənbədə məlumat yoxdur. Bu da təbii ki, aidiyyatı qurumların, xüsusilə də Azərbaycan Yerüstü Nəqliyyat Agentliyinin yarıtmaz fəaliyyətinin nəticəsidir. Azərbaycanda nəqliyyat sektoruna milyardlarla vəsait xərclənir, amma yenə də problemlər bitib-tükənmir".
