Çin Tayvan boğazında hərbi təlimlərə başlayıb
Çin Tayvan boğazında hərbi təlimlərə başladığını açıqlayıb.
Tayvanın yerləşdiyi bölgədən məsul olan Çin Xalq Qurtuluş Ordusunun (PLA) Şərq Cəbhəsi Komandanlığının sözçüsü polkovnik Şi Yi “Boğaziçi daşqını 2025/A” adlı manevrin Tayvan boğazının mərkəzi və cənub bölgələrində həyata keçirildiyini bildirib.
Sözçü təlimin müəyyənləşdirmə və yoxlama, xəbərdarlıq və dəf etmə, müdaxilə və saxlama üzərində qurulduğunu və məqsədin bölgənin formalaşması və nəzarəti, əsas hədəflərə atəş açmaqda qoşunların birgə əməliyyat qabiliyyətini yoxlamaq olduğunu vurğulayıb.
Bu arada, Çin ordusunun dünən başladığı adanı əhatə edən hərbi manevr və sahil mühafizə patrulu davam edir.
Qeyd edək ki, Çin ordusu dünən Tayvan adasını əhatə edən hərtərəfli hərbi təlimə başladığını açıqlayıb. Quru, dəniz, hava və raket qüvvələrinin iştirak etdiyi təlimdə dəniz-hava döyüş hazırlığı patrulları, hərtərəfli üstünlük əldə etmək, dəniz və quru hədəflərinə hücumlar, əsas bölgələrin və dəniz zolaqlarının bağlanması mövzusuna diqqət yetiriləcəyi qeyd edilib.
Çin Sahil Mühafizəsi də hərbi təlimlə eyni vaxtda Tayvan ətrafında hüquq-mühafizə orqanlarının patrulu həyata keçirdiyini açıqlayıb. Sahil mühafizə gəmilərinin bölgədə icazəsiz üzən gəmilərdə yoxlama, müdaxilə, ələ keçirmə və yaxalama təlimi keçdiyi bildirilib.
Tayvan Müdafiə Nazirliyi X hesabında verdiyi açıqlamada dünən gecədən bu səhərə qədər Tayvan adası ətrafında 76 Çin hərbi təyyarəsi və 19 gəminin göründüyünü bildirib.
Açıqlamada təyyarələrdən 37-nin Tayvan boğazında tərəflərin təsir zonalarını ayırması hesab edilən orta xətti keçərək, Tayvanın Hava Hücumundan Müdafiə Müəyyənetmə Zonası (ADIZ) elan etdiyi ərazinin şimal, mərkəzi, cənub-qərb və şərq hissələrində uçuşlar həyata keçirdiyi bildirilib.
Adanın ətrafında Çin donanmasına aid 15 döyüş gəmisi və Çin sahil mühafizəsinə aid olduğu güman edilən 4 "rəsmi gəmi"nin də təsbit edildiyi bildirilib və Tayvan ordusunun vəziyyəti izlədiyi və cavab verdiyi qeyd edilib.
