Tramp: Yeni tariflər ABŞ-a trilyonlarla dollar qazandıracaq
ABŞ prezidenti Donald Tramp bəyan edib ki, bazarlarda kəskin eniş gözlənilə bilər, lakin qarşılıqlı tariflər ölkəsinə trilyonlarla dollar qazandıracaq.
Dünən Trampın imzaladığı fərmanla ABŞ-ın ticarət etdiyi 185 ölkəyə “qarşılıqlı tariflər” tətbiq edəcəyi və əsas tarif dərəcəsinin 10 faiz olacağını açıqlaması dünyanın gündəm mövzusuna çevrilib.
“Air Force One” təyyarəsində mətbuata açıqlama verən Tramp ABŞ-ın ticarət tərəfdaşlarına tətbiq etdiyi tariflərə görə bazarlarda kəskin enişin gözlənilə biləcəyini deyib.
Tariflərin iqtisadiyyatı tənəzzülə sürükləyə biləcəyinə dair narahatlıqlar səbəbiylə Nyu-York birjasının günü kəskin enişlə başa vurmasını şərh edən Tramp, "Məncə, hər şey çox yaxşı gedir. Bazarlar partlayacaq, birja partlayacaq" deyib.
“İqtisadiyyatda çoxlu problemlər var idi” deyən Tramp ABŞ iqtisadiyyatını əməliyyata ehtiyacı olan xəstə ilə müqayisə edib. Tramp "Xəstənin vəziyyəti ağır idi. Əməliyyat olundu. Güclü iqtisadiyyat olacaq. Bu heyrətamiz olacaq" ifadələrini qeyd edib.
Tariflərdən qaçmaq üçün ABŞ-da istehsal etmək istəyən şirkətlərdən ölkəyə trilyonlarla dollar investisiya gələcəyini bildirən Tramp, "Dünyanın qalan hissəsi razılaşmanın bir yolunun olub olmadığını görmək istəyir" deyib.
Tarifləri açıqladıqdan sonra ölkələrin onlara zəng etdiyini bildirən Tramp "Etdiyimiz işin gözəlliyi budur. Özümüzü sürücünün yerinə oturduq. Bu ölkələrdən bizə yaxşılıq etmələrini istəsəydik, yox deyərdilər. İndi bizim üçün hər şeyi edəcəklər" söyləyib.
Tramp qeyd edib ki, ABŞ-da artıq bir çox istehsal müəssisələri tikilib və indi çoxlu tikinti işləri aparılacaq və tariflər ABŞ-ı çox zəngin edəcək.
