Yaponiya Trampın 90 günlük tarifləri dayandırmasını müsbət hadisə kimi qiymətləndirib
Yaponiya hökuməti ABŞ prezidenti Donald Trampın qisas almayan ölkələr üçün gömrük tariflərini 90 gün müddətinə dayandırmaq qərarını müsbət hadisə kimi qiymətləndirib.
"Kyodo News"un məlumatına görə, Yaponiya Nazirlər Kabinetinin Baş katibi Hayaşi Yoşimasa mətbuat konfransında ABŞ-ın ticarət etdiyi ölkələrə qarşılıqlı tariflər tətbiq etmə qərarının ikitərəfli iqtisadi əlaqələrə təsiri ilə bağlı narahatlıqlarını ABŞ tərəfinə çatdırdıqlarını və qərarın nəzərdən keçirilməsini tələb etdiklərini bildirib.
Trampın qisas almayan ölkələr üçün tarifləri 90 gün müddətinə dayandırma qərarını gördüklərini ifadə edən Hayaşi, Vaşinqton hökumətini polad, alüminium, avtomobil və avtomobil hissələrinə tətbiq edilən digər tarifləri nəzərdən keçirməyə təşviq etməyə davam edəcəklərini vurğulayıb.
Yaponiyanın baş naziri İşiba Şigeru da açıqlamasında ABŞ-ın yüksək gömrük tariflərinin ölkəsinin ixrac yönümlü iqtisadiyyatına təsirini azaltmaq üçün bütün mümkün addımları atacaqlarını bildirib.
İşiba, tariflərin müzakirə ediləcəyi ABŞ ilə nazirlər səviyyəsində danışıqlara başlamağa hazırlaşdıqlarını bildirərkən, "Kyodo News"a danışan bir mənbə hökumət rəsmilərindən biri olan Ryosei Akazavanın gələn həftə ABŞ-ın maliyyə naziri Skot Besent ilə danışıqlar aparmaq üçün ABŞ-a səfər edəcəyini qeyd edib.
