İran MAQATE müfəttişlərinin nüvə obyektlərinə girişinin məhdudlaşdırılmasının səbəbini açıqlayıb
İran ABŞ və İsrailin ölkəyə qarşı təcavüzü səbəbindən Atom Enerjisi üzrə Beynəlxalq Agentliyin (MAQATE) müfəttişlərinin İranın nüvə obyektlərinə girişini məhdudlaşdırıb.
AFN.az xəbər verir ki, bu barədə İslam Respublikası Xarici İşlər Nazirliyinin rəsmi nümayəndəsi İsmayıl Bəqayi məlumat verib.
"Qərb ölkələrinin tələbləri tamamilə əsassızdır, çünki MAQATE-nin nüvə obyektlərinə girişinin məhdudlaşdırılması ABŞ və İsrailin İranın nüvə mərkəzlərinə qarşı cinayətkar və təcavüzkar əməllərinin birbaşa nəticəsidir", - deyə o, mətbuat konfransı zamanı bildirib.
Bəqayinin fikrincə, Avropa ölkələrinin İranın nüvə dosyesini yenidən BMT Təhlükəsizlik Şurasının müzakirəsinə çıxarmaq cəhdləri onların keçən payız BMT TŞ sanksiyalarının bərpası ilə bağlı verdikləri bəyanatlarla ziddiyyət təşkil edir.
"Bu, İran, Çin və Rusiyanın həmin mexanizmin (BMT TŞ sanksiyalarının avtomatik bərpası üzrə "snapback" mexanizmi nəzərdə tutulur) qanunsuzluğu və tətbiq edilməzliyi ilə bağlı mövqeyinin haqlı olduğunu sübut edir", - deyə diplomat əlavə edib.
