Belçikanın Baş naziri Bart De Wever istefasını Kral Filipə təqdim edib
Belçikanın Baş naziri Bart De Weverin federal hökumətin büdcə danışıqlarında razılığa gələ bilməməsindən sonra istefasını Kral Filipə təqdim etdiyi bildirilir.
AFN.az xəbər verir ki, Belçika Kral Sarayının ABŞ-ın “X” şirkətinə məxsus sosial media platformasındakı hesabında yayılan açıqlamada Kral Filipin De Weveri qəbul etdiyi bildirilib.
Uğursuzluqla nəticələnən büdcə danışıqlarından sonra Baş nazirin istefasını təqdim etdiyi qeyd olunan açıqlamada Kralın qərarını hələlik təxirə saldığı və sabahdan etibarən koalisiyanı təşkil edən çoxluq partiyalarının liderləri ilə məsləhətləşmələrə başlayacağı ifadə edilib.
Belçika Kral Sarayının yaydığı yazılı açıqlamada da Kralın büdcə məsələsində razılıq əldə olunmamasından təəssüfləndiyi bildirilib.
Açıqlamada Kralın geosiyasi qeyri-müəyyənliklərin və ciddi iqtisadi çətinliklərin yaşandığı hazırkı şəraitdə ölkənin uzunmüddətli siyasi böhrana tab gətirə bilməyəcəyini vurğuladığı qeyd edilib.
Kralın bütün tərəfləri məsuliyyətlə davranmağa çağırdığı vurğulanan açıqlamada bildirilib: Kral bütün aidiyyəti tərəfləri ümumi maraqları və kompromis anlayışını ön planda tutmağa dəvət edib. Baş nazir noyabrın 6-da, cümə günü yenidən Kral tərəfindən qəbul ediləcək.
Kral Filipin Baş nazir De Weverin istefasını qəbul etməsi halında Belçikada yeni hökumətin qurulması prosesi başlaya bilər.
Bu müddətdə mövcud hökumət yeni hökumət fəaliyyətə başlayana qədər gündəlik dövlət işlərini idarə etmək üçün müvəqqəti hökumət kimi fəaliyyətini davam etdirə bilər.
Kralın siyasi partiyalarla məsləhətləşmələr apararaq yeni koalisiya hökumətinin qurulması üçün təşəbbüsə başlaması da mümkün variantlar arasındadır.
Mövcud koalisiya tərəfdaşlarının yenidən razılığa gələ bilməməsi və fərqli hökumət formullarının da nəticə verməməsi halında növbədənkənar seçki ehtimalı gündəmə gələ bilər.
Belçika yerli mətbuatında yayılan xəbərlərdə dünən səhər başlayan və saat 01:00-dək davam edən büdcə danışıqlarında razılıq əldə olunmadığı bildirilmişdi.
Danışıqlarda De Weverin həftəsonu baş nazir müavinləri ilə ayrı-ayrılıqda keçirdiyi görüşlərdən sonra yeni büdcə təklifi təqdim etdiyi, lakin hökumətin əsas heyətinin təkliflə bağlı razılığa gələ bilmədiyi qeyd edilmişdi.
De Wever daha əvvəl müvəqqəti büdcə vəsaitlərinin aylıq ayrılması praktikasını qəbul etməyəcəyini açıqlamışdı.
Belçikada hökumət təxminən 8 ay davam edən koalisiya danışıqlarından sonra 3 fevral 2025-ci ildə qurulmuşdu. Yeni Flaman Alyansının (N-VA) lideri Bart De Wever ölkənin yeni baş naziri olmuşdu.
Koalisiyanın digər tərəfdaşları liberal frankofon “MR” partiyası, mərkəzçi frankofon “Les Engagés”, sosialist flamand “Vooruit” və xristian demokrat “CD&V” partiyaları olmuşdu.
