Hindistanın cənubunda şiddətli fırtına səbəbindən məktəblər və iş yerləri bağlanıb
Hindistanın cənubunda səlahiyyətlilər yaxın 24 saat ərzində quruya çıxması gözlənilən şiddətli fırtına ərəfəsində məktəbləri və iş yerlərini bağlayıb, uçuşları dayandırıb və sahilyanı əraziləri boşaldıb.
Ölkənin meteoroloji bürosunun bildirdiyinə görə, çərşənbə axşamı səhər Hindistanın cənubundakı Andhra Pradeş əyalətinin sahillərinə "Miçaunq" siklonunun vuracağı, küləyin sürətinin 110 km/saata çatacağı gözlənilir.
Andhra Pradeşdə səlahiyyətlilər səkkiz sahil bölgəsində təxminən 7,000 insanı təxliyə edib və siklonun yolundan və şiddətindən asılı olaraq ümumilikdə 28,000 nəfəri təxliyə etməyə hazırlaşırlar. Bu barədə əyalətin fəlakətlərin idarə olunması departamentinin yüksək vəzifəli rəsmisi Reuters-ə bildirib.
Tamil Nadu ştatında səlahiyyətlilər dörd sahil bölgəsində rəsmi tətil elan ediblər və sakinlərdən lazım olmadıqca çölə çıxmamalarını istəyiblər.
Mətbuatın verdiyi məlumata görə, Çennai hava limanı bazar ertəsi səhər şəhərə yağan güclü yağışdan sonra iki saatlıq fəaliyyətini dayandırıb, bir neçə reys ləğv edilib və ya digər şəhərlərə istiqamətləndirilib.
