Küveyt əmiri parlamenti buraxdı, konstitusiyanın bəzi maddələrinin fəaliyyətini dayandırdı
Küveyt əmiri Şeyx Məşəl əl-Əhməd əl-Cabir əs-Sabah ölkənin siyasi arenasında mühüm addım ataraq, Parlamenti buraxdığını və konstitusiyanın bəzi maddələrinin fəaliyyətini dayandırdığını açıqlayıb. Bu addım ölkədə siyasi tarazlığın əhəmiyyətli dərəcədə dəyişməsindən xəbər verir. Körfəz ölkəsində keçirilən seçkilərdən həftələr sonra Küveyt əmiri parlamenti buraxıb və onun bəzi funksiyalarını üzərinə götürüb.
Bu barədə dövlət mediası xəbər verib.
Dövlət televiziyasında verilən açıqlamada Əmir əs-Sabahın parlamenti buraxma qərarı ilə bağlı rəsmi açıqlama verilib.
Küveyt konstitusiyası ilə bağlı qəbul edilən qərarları Əmir əs-Sabah da açıqlayıb. Demokratik prosesin tam qiymətləndirilməsinə qədər konstitusiyadakı bəzi maddələrin maksimum dörd il müddətinə dayandırılacağı açıqlanıb. Sərəncamda qüvvəsi dörd ildən çox olmayan müddətə dayandırılmış konstitusiya maddələri barədə məlumat verilməyib.
Dövlət televiziyasına açıqlama verən əl-Sabah, “Küveyt son vaxtlar çətin günlər yaşayır. Ölkəni xilas etmək və onun ən yaxşı maraqlarını təmin etmək üçün çətin qərar qəbul etməkdə tərəddüd və ya gecikməyə yer qoymur” deyib.
Dövlət televiziyası Milli Assambleyanın səlahiyyətlərini əmir və ölkənin Nazirlər Kabinetinin üzərinə götürəcəyini bildirib.
"Küveytin əvvəlki illərdə yaşadığı qeyri-sağlam atmosfer korrupsiyanın əksər dövlət qurumlarına yayılmasına təkan verdi və təəssüf ki, təhlükəsizlik və iqtisadi qurumlara da çatdı. Bu hətta ədliyyə sisteminə də təsir etdi", - 83 yaşlı monarx deyib.
Aprel seçkiləri ötən ilin dekabrında ögey qardaşı və sələfi Şeyx Navaf əl-Əhməd əl-Cabir əs-Sabahın ölümündən sonra hakimiyyətə gələn Şeyx Meşal dövründə ilk seçkilər idi.
Milli Assambleya ilə Nazirlər Kabineti arasında təkrarlanan fikir ayrılıqları Parlamentin buraxılmasına səbəb oldu və ölkənin neft gəlirlərindən asılılığını azaltmağa yönəlmiş investisiya və islahatları məhdudlaşdırdı.
Parlament bazar ertəsi ilk dəfə iclas keçirməli idi, lakin bəzi siyasətçilər hökumətə qoşulmaqdan imtina etdilər.
