Zelenski: İkinci Sülh Sammitini təşkil etmək istəyən ölkələrlə danışıqlara başladıq
Ukrayna prezidenti Vladimir Zelenski Ukrayna Sülh Sammitindən sonra ölkəsində texniki səviyyədə təhlükəsizliyin və sülhün bərpası üzrə birgə işi davam etdirmək qərarına gəldiklərini açıqlayıb.
O, İsveçrənin Bürgenstok şəhərində keçirilən Ukrayna Sülh Sammitinin bağlanışında keçirilən birgə mətbuat konfransında danışıb.
Zirvə üçün üç bənd seçərək düzgün addım atdıqlarını ifadə edən Zelenski, ərzaq təhlükəsizliyi, nüvə təhlükəsizliyi və məhbusların azad edilməsi/Rusiya tərəfindən qaçırılan ukraynalı uşaqların geri qaytarılması ilə bağlı sammit iştirakçılarının görüşü nəticəsində əməli addımların atıla biləcəyini vurğulayıb.
Zelenski bütün dünyada atom elektrik stansiyalarının və digər nüvə obyektlərinin təhlükəsizliyində maraqlı olduqlarını bildirib və deyib: “Bunu tam dərk etdikləri və Zaporojya Nüvə təhlükəsizliyinin yenidən bərpa edilməsi zərurətini qəbul etdikləri üçün sammit iştirakçılarına minnətdaram".
Qida təhlükəsizliyinin təkcə cənub ölkələri üçün deyil, dünyanın hər bir ölkəsi üçün əsas məsələ olduğunu bildirən Zelenski, "Ərzaq təhlükəsizliyi bazarlarının pozulması birbaşa xaosa aparan yoldur. Təəssüf ki, Rusiya tez-tez dünyaya liderlik etməyə çalışıb. Bu səbəbdən dünyadakı hər bir ailə, hər bir insanın yemək haqqını təmin etmək və qiymət xaosundan qorunmaq üçün birləşməliyik" - deyə qeyd edib.
Zelenski Rusiya tərəfindən əsir götürülənlərin azad edilməsi və qanunsuz oğurlanmış ukraynalı uşaqların geri qaytarılması məsələlərini müzakirə etdikləri üçün sammit iştirakçılarına minnətdar olduğunu bildirib və deyib: “Biz hər bir mülki vətəndaşımızı, qaçırılan uşaqları geri qaytarmalıyıq. Biz minlərlə insanın azad edilməsini təmin etməliyik".
Ən qısa zamanda nəticələrə nail olacağına ümid etdiyini deyən Zelenski qeyd edib ki, təhlükəsizliyin və sülhün bərpası istiqamətində atılan bu əməli addımlar dünyada hər kəsə göstərəcək ki, BMT Nizamnaməsinin bütün prinsip və məqsədləri, eləcə də onun təsiri yenidən qurulub.
Ədalətli sülh üçün atılan hər addımın sammit iştirakçılarının və hələ sammitə qatılmayan, lakin sülhdə maraqlı olan bəzi ölkələrin diqqətini çəkdiyini bildirən Zelenski bildirib ki, ikinci Sülh Sammitini təşkil etmək istəyən ölkələr var: "Biz onlarla danışıqlara başladıq. 101 ölkə və beynəlxalq təşkilatı bir araya gətirməklə biz Ukrayna və tərəfdaşlarımız üçün böyük uğur əldə etdik. Bizim ədalətli məqsədimiz bütün dünya ölkələrinin bu şərəfli təşəbbüsdə iştirak etməsidir".
