ABŞ: Rusiya Şimali Koreyadan silah-sursatını artırmağı xahiş edir
Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi Rusiyanın müdafiə naziri Sergey Şoyqunun Şimali Koreyaya səfəri zamanı Pxenyandan Moskvaya silah-sursat satışını artırmasını istədiyini bildirib.
Şoyqunun səfəri zamanı Şimali Koreya rəsmiləri ilə görüşdüyünü deyən Kirbi onun Rusiya-Ukrayna müharibəsi zamanı ölkəsinin ehtiyac duyduğu sursat satışının artırılmasını tələb etdiyini iddia edib.
Kirbi Şoyqunun bu istəyini “Putinin döyüş maşını kimi sanksiyalar və ixrac nəzarətlərindən təsirlənərək necə aciz qaldığının daha bir nümunəsi” adlandırıb. O, Ukraynanı işğal etmək cəhdində Rusiyanın İran, Şimali Koreya və Çinin dəstəyini almağa çalışdığını deyib.
ABŞ dövlət katibi Antoni Blinken iyulun 29-da deyib ki, Şoyqunun Şimali Koreyaya silah almaq üçün getdiyi ehtimalı var.
Ağ Ev 2023-cü ilin martında Rusiyanın Şimali Koreya ilə silah əvəzinə ərzaq müqaviləsi bağlamaq istədiyini göstərən kəşfiyyat məlumatı topladığını iddia etmişdi.
