ABŞ ilkin şərt olmadan Şimali Koreya ilə danışıqlara hazır olduğunu açıqladı
Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi ABŞ-ın Şimali Koreya ilə Koreya yarımadasının nüvəsizləşdirilməsinə dair ilkin şərt olmadan danışıqlara hazır olduğunu bildirib.
Con Kirbi "Kyodo News"a müsahibəsində Şimali Koreyanın Koreya yarımadasının nüvəsizləşdirilməsi ilə bağlı qeyd-şərtsiz danışıqlara müsbət cavab vermədiyini, lakin təklifin hələ də qüvvədə olduğunu bildirib.
"Biz Şimali Koreya ilə ilkin şərt olmadan oturub danışıqlara hazırıq", - Kirbi bildirib.
Şimali Koreyanın təklifə cavab verməməsinə münasibət bildirən Kirbi Kim Çen Inın görüşmək istəmədiyini şərh edib: "Ölkəmizin, müttəfiqlərimiz olan Koreya və Yaponiyanın təhlükəsizliyini və maraqlarını müdafiə etmək üçün hər cür hazır olmalıyıq".
Kirbi, daha əvvəl regional təhlükəsizliyi təmin etmək üçün fəaliyyətlər həyata keçirdiklərini və lazım gəldikdə bu fəaliyyətləri təkrarlaya biləcəklərini vurğulayıb.
