ABŞ-ın BMT Təhlükəsizlik Şurasında HƏMAS-ı qınamaq tələbi cavabsız qalıb
Birləşmiş Millətlər Təşkilatının Təhlükəsizlik Şurasının dünən keçirilən iclasında ABŞ-ın HƏMAS-ı qınamaq çağırışlarının cavabsız qaldığı açıqlanıb.
Birləşmiş Millətlər Təşkilatının Təhlükəsizlik Şurası HƏMAS Hərəkatının 7 oktyabr şənbə günü başlatdığı hücumlarla bağlı dünən iclas keçirib.
Qapalı keçirilən görüşdən sonra nümayəndələr jurnalistlərə açıqlama veriblər.
ABŞ-ın BMT-dəki daimi nümayəndəsinin müavini Robert Vud qeyd edib ki, HƏMAS-ın hücumları iclasda bir çox üzv tərəfindən pislənib, lakin Şura üzvlərinin hamısı bu qınağı dəstəkləməyib.
Vud, görüşdə ABŞ-ın diqqətinin HƏMAS-ı qınamaq olduğunu ifadə edərək, HƏMAS-ın "İsrail xalqına qarşı terror hücumlarını ən qısa zamanda dayandırması" lazım olduğunu vurğulayıb.
İsrail və Fələstin arasında iki dövlətli həllin vacib olub-olmaması ilə bağlı suala Vud belə cavab verib: "Bunun üçün vaxt olacaq. Hazırda biz Həmas-ın girov götürməsi və hücumları ilə məşğul olmalıyıq".
