Aİ Şurası Ukraynaya təqribən 3,5 milyard avro məbləğində ödənişi təsdiqləyib
Aİ Şurası Kiyevə təxminən 3,5 milyard avro məbləğində makromaliyyə yardımının ödənilməsini təsdiqləyib.
AFN.az xəbər verir ki, bu barədə qurumun saytında dərc olunmuş press-relizdə bildirilir.
Bu, Ukraynaya Yardım Fondu vasitəsilə geri qaytarılmayan kredit və qrantların üçüncü tranşıdır.
Bu ödənişlə birlikdə 2024-cü ildə Fondun fəaliyyətə başlamasından bəri Kiyevə verilən vəsaitin ümumi həcminin 20 milyard avroya çatacağı bildirilir.
Aİ Şurası belə qənaətə gəlib ki, Kiyev Ukraynaya Yardım Fondundan üçüncü vəsaiti almaq üçün lazımi şərtləri yerinə yetirib. Xüsusilə, sənəddən məlum olduğu kimi, məsələ bərpa olunan enerji mənbələrindən istifadənin genişləndirilməsi, enerji tənzimləyicisinin muxtariyyətinin artırılması, Aİ standartlarına uyğun olaraq sərhəddən keçmə prosedurlarının sadələşdirilməsi, kənd təsərrüfatının və kənd yerlərinin inkişafı strategiyasının qəbulu, o cümlədən kənd təsərrüfatı torpaqlarının minalardan təmizlənməsi istiqamətində islahatlara aiddir; həmçinin ölkənin strateji və mühüm xammal ehtiyatlarının siyahısının tərtibi üzrə işlərin davam etdirilməsi haqqında olan tapşırıqlardan söhbət gedir.
2024-cü ilin fevralında Aİ Şurası 50 milyard avro dəyərində Ukraynaya Yardım Fondunun yaradılmasını təsdiqləyib. Dörd il - 2024-cü ildən 2027-ci ilə qədər hesablanan bu vəsaitin Kiyevə qrant və kredit şəklində verilməsi planlaşdırılır. Onlar həm Ukrayna dövlətinin qısamüddətli ehtiyaclarını, həm də ölkənin yenidən qurulması və modernləşdirilməsi üzrə ortamüddətli vəzifələrin həllini təmin etməlidirlər.
