Taylandda daşqınlardan 2,1 milyon insan zərər çəkib
Taylandda şiddətli yağışların yaratdığı daşqınlar 2,1 milyon insanın həyatına mənfi təsir edib və 13 nəfərin ölümünə səbəb olub.
“The Nation” qəzetinin xəbərinə görə, Fövqəladə Hallarla Mübarizə və İdarəetmə Departamenti (DDPM) ölkədə baş verən daşqınlarla bağlı açıqlama yayıb.
Açıqlamaya əsasən, Taylandın cənubunda 9 əyalətdə daşqından zərər çəkənlərin sayı 2,1 milyon nəfərə çatıb, 13 nəfər isə həyatını itirib.
Digər tərəfdən, “Bangkok Post” qəzetinin məlumatına görə, donanma daşqından zərər görmüş cənub əyalətlərinə təyyarədaşıyan gəmi ilə yanaşı, yardım ləvazimatları və tibbi heyətlə birlikdə 14 qayıqdan ibarət bir donanma göndərməyə hazırlaşır.
Qeyd edək ki, "Bualoi" tayfunu sentyabrın sonundan bəri Filippin və Tayland da daxil olmaqla Cənub Asiya ölkələrində ölüm hallarına səbəb olub.
Cənub və Cənub-Şərqi Asiyada iyun–sentyabr aylarında təsirli olan musson yağışları hər il böyükmiqyaslı təbii fəlakətlərə və qəzalara yol açır.
