İrlandiyalı ABŞ hərbi təyyarəsinə balta ilə hücumda ittiham olunur
ABŞ rəsmiləri İrlandiyanın Şennon hava limanında uçuş-enmə zolağına gizli daxil olaraq 60 milyon dollar dəyərindəki Amerika hərbi təyyarəsini yararsız hala salmaqda şübhəli bilinən İrlandiya vətəndaşına qarşı ittiham irəli sürüblər.
AFN.az xəbər verir ki, 48 yaşlı Daiti O'Korraynın Limerik şəhəri yaxınlığındakı Şennon hava limanında park edilmiş ABŞ Hərbi Hava Qüvvələri Milli Qvardiyasına məxsus C-130 Hercules tipli təyyarəyə zərər verməzdən əvvəl ətraflı araşdırma apardığı iddia olunur.
O'Korrayn təyyarəyə kimyəvi maddələr və balta da daxil olmaqla müxtəlif alətlərdən istifadə etməklə ziyan vurmaqda ittiham edilir.
ABŞ prokurorları şübhəliyə 10 ilədək həbs cəzası nəzərdə tutan dövlət əmlakına zərər vurma ittihamı irəli sürüblər.
Associated Press (AP) agentliyinin məlumatına görə, O'Korrayn hazırda ABŞ orqanlarının nəzarətində deyil. Şübhəlini təmsil edərək açıqlama verə biləcək vəkilinin olub-olmadığı da hələlik məlum deyil.
Çərşənbə axşamı Nyu-York prokurorlarının ictimaiyyətə açıqladığı məhkəmə sənədlərində Federal Təhqiqat Bürosunun (FTB) rəsmiləri bu əməlin ABŞ-nin milli təhlükəsizliyini təhlükə altına aldığını bildiriblər. Rəsmilər təyyarənin ABŞ hərbi missiyası çərçivəsində başqa ölkəyə uçarkən hava limanında park vəziyyətində olduğunu qeyd ediblər.
Prokurorlar məhkəmə sənədlərində Daiti O'Korraynın ABŞ hərbi təyyarəsinə qarşı qəsdən və planlı hücum təşkil edərək on milyonlarla dollar dəyərində zərər vurduğunu və mühüm hərbi əməliyyatları təhlükə altına saldığını iddia ediblər.
FTB direktorunun müavini Ceyms Barnakl kiçik bu hadisənin ani vandalizm aktı olmadığını vurğulayıb. Onun sözlərinə görə, O'Korrayn təyyarəni araşdırmaq, alət və materiallar əldə etmək, eləcə də vura biləcəyi zərəri maksimum həddə çatdırmaq məqsədilə aylarla hazırlıq görüb.
Rəsmilər şübhəlinin 11 aprel 2026-cı ildə törətdiyi əməl üçün geniş plan hazırladığını və bir neçə saat davam edən dağıntı zamanı istifadə edəcəyi alətləri özü ilə gətirdiyini bildiriblər.
Açıqlamaya görə, şübhəli kilid mexanizmini sındıraraq təyyarəyə daxil olub, daha sonra pəncərələri bağlayıb və qapıları qayışlarla bərkidib.
ABŞ ittiham aktında yer alan məlumatlara görə, O'Korrayn təyyarənin daxili hissəsinə ciddi ziyan vurub. Onun elektrik naqillərini və hidravlik xətləri kəsdiyi, maye oksigen xəttini əzdiyi, kokpitdəki bütün göstəriciləri sındırdığı və hava kanallarını deşdiyi bildirilir.
Şübhəlinin alüminium və poladı aşındıra bilən qallium maddəsindən istifadə etdiyi, yanacaq çəninə polad kürəciklər tökdüyü və balta ilə təyyarənin xarici gövdəsini deşdiyi də qeyd olunur.
Hava limanının əməkdaşları tərəfindən aşkar edilən və təyyarənin üzərində olarkən görüntülənən O'Korrayn hadisə yerində saxlanılıb. İrlandiya milli polisi ona əmlaka zərər vurma ittihamı irəli sürüb.
ABŞ rəsmilərinin hazırladığı ittiham sənədində böyük partlayışa səbəb ola biləcək xətlərdən birini kəsməkdən çəkinməsinin şübhəlinin hərəkətlərini ətraflı planlaşdırdığını göstərdiyi bildirilib.
Limerick Post qəzetinin məlumatına görə, Kork şəhərində qeydiyyatda olan O'Korrayn tərəfdarları tərəfindən müharibə əleyhinə fəal kimi xarakterizə edilir.
ABŞ hərbi qulluqçuları üçün mühüm tranzit məntəqəsi olan Şennon hava limanında tez-tez müharibə əleyhinə etiraz aksiyaları keçirilir. Hava limanından sentyabr ayında ABŞ Prezidenti Donald Trampın İrlandiyaya səfəri zamanı da istifadə olunub.
ABŞ prokurorları son illərdə etirazçıların hava limanında bir sıra təhlükəsizlik pozuntularına yol verdiklərinə diqqət çəkiblər.
Bu çərçivədə 2025-ci ilin mayında üç nəfərin mikroavtobusla ərazinin hasarını aşaraq hava limanına daxil olduğu, həmin ayın sonrakı günlərində isə ABŞ təyyarələrindən birinə boya püskürdülərək onun müvəqqəti olaraq istifadəyə yararsız hala salındığı xatırladılıb.


