Nvidia Jensen Huangı yenidən CEO vəzifəsinə qaytarmaq niyyətində deyil
Nvidia şirkətinin Direktorlar Şurası keçmiş baş icraçı direktoru (CEO) Jensen Huangı yenidən bu vəzifəyə təyin etməyi düşünmür.
AFN.az xəbər verir ki, bunu şirkətin Direktorlar Şurasının sədri Harvi Cons açıqlayıb.
Nvidia 2027-ci maliyyə ilinin üçüncü rübü hesab edilən və oktyabrın 25-də başa çatan üç aylıq dövrün maliyyə nəticələrinə dair telekonfrans keçirib.
Harvi Cons çıxışında Nvidia-nın son dərəcə güclü şirkət olduğunu və maliyyə göstəricilərinin də bunu aydın şəkildə nümayiş etdirdiyini bildirib.
O xatırladıb ki, Direktorlar Şurası noyabrın 12-də Jensen Huangın şirkətin davranış qaydaları, standartları və korporativ mədəniyyəti ilə uyğun gəlməyən şəxsi davranışlarının üzə çıxmasından sonra sədr, CEO və Direktorlar Şurasının üzvü vəzifələrindən öz istəyi ilə istefa verdiyini açıqlayıb. Consun sözlərinə görə, Huangın istefası yekdilliklə qəbul edilib və onu yenidən CEO vəzifəsinə təyin etmək niyyətləri yoxdur.
Cons Huangın istefası ilə bağlı şərtlər və davam edən araşdırma barədə heç bir açıqlama verməyəcəklərini, bu mövzuda sualları cavablandırmayacaqlarını bildirib.
Yeni CEO-nun seçilməsi prosesində şirkət daxilindən və xaricindən namizədlərin nəzərdən keçiriləcəyini deyən Cons, qabaqcıl çip texnologiyaları və milli təhlükəsizlik dinamikasının sektorda böyük dəyişikliklərə səbəb olduğunu vurğulayıb. Onun fikrincə, yeni rəhbər bu şəraiti çox diqqətlə idarə etməli olacaq.
Cons daimi CEO-nun mümkün qədər tez vəzifəyə gətirilməsini istədiklərini, lakin uyğun namizəd tapılmadan təyinat prosesini tələsdirməyəcəklərini qeyd edib.
Nvidia-nın müvəqqəti CEO-su və maliyyə direktoru (CFO) Kolet Kress isə şirkətin biznes fəaliyyətində hər şeyin əvvəlki qaydada davam etdiyini bildirib.
Şirkətin müştəriləri, təchizatçıları və biznes tərəfdaşları ilə əlaqədə olduqlarını deyən Kress onların hamısının Nvidia-ya tam dəstək verdiyini vurğulayıb. O bildirib ki, müştərilər şirkətin biznes perspektivlərini dəstəklədiklərini və bu prosesdə kömək etməyə hazır olduqlarını ifadə edirlər. Bundan əlavə, onlar təkliflə tələb arasındakı fərqi azaltmaq üçün təchizatçılarla sıx əməkdaşlıq edirlər.
Son günlər Çinin xeyrinə casusluq etdiyi iddia edilən qadınla münasibətləri də daxil olmaqla, evlilikdənkənar əlaqələri barədə xəbərlərlə gündəmə gələn Huangın istefası Nvidia-nın maliyyə nəticələrinə dair telekonfransı investorların və bazar iştirakçılarının diqqət mərkəzində saxlamasına səbəb olub.
Nvidia Direktorlar Şurası noyabrın 8-də Huangın xarici kəşfiyyat fəaliyyətinin hədəfi olduğuna dair xəbərlərdən sonra müstəqil araşdırmaya başlanıldığını açıqlamışdı.
Digər tərəfdən, The New York Times qəzetində dərc olunan xəbərdə Huangın şirkətdə ona tabe olan rəhbər şəxslərdən biri ilə də evlilikdənkənar münasibət yaşadığı iddia edilmişdi.
Nvidia noyabrın 12-də Huangın sədr, baş icraçı direktor və Direktorlar Şurasının üzvü vəzifələrindən dərhal qüvvəyə minməklə ayrıldığını, şirkətin sədr müavini və maliyyə direktoru Kolet Kressin isə müvəqqəti CEO təyin edildiyini bildirmişdi.
Şirkətdən ayrıldıqdan sonra dünən ilk dəfə açıqlama verən Huang, Direktorlar Şurasının onun geri qayıtmasının səhmdarların, əməkdaşların, şirkətin və ABŞ-nin maraqları baxımından ən yaxşı qərar olacağına qənaətə gələcəyi təqdirdə CEO vəzifəsinə qayıtmağa hazır olduğunu bildirmişdi.

