OpenAI yeni süni intellekt köməkçisi “dots”u təqdim etdi
OpenAI istifadəçinin adından proaktiv şəkildə tapşırıqları yerinə yetirə bilən yeni süni intellekt köməkçisi “dots”u (“nöqtələr”) təqdim edib.
AFN.az xəbər verir ki, San-Fransiskoda keçirilən illik tərtibatçılar günündə çıxış edən Altman köməkçini ağla gələ biləcək hər şeyi həqiqətən həll edə bilən, son dərəcə bacarıqlı, daim aktiv agentlər kimi xarakterizə edib.
Süni intellekt agentlərinin daxili sınaqları gözlənilməz və zaman-zaman zərərli hərəkətləri üzə çıxarıb.
Şirkət bu səbəbdən ciddi araşdırma ilə üzləşdiyi bir vaxtda, OpenAI prezidenti Qreq Brokman və digər texnologiya liderləri ABŞ Prezidenti Donald Trampla görüş keçirib.
“Dots” sıx həyat tərzi keçirən insanlar üçün rəqəmsal köməkçi funksiyasını yerinə yetirmək məqsədi daşıyan, parlaq rəngli sevimli cizgi filmləri kimi təqdim edilib.
Tədbirdə insanların köməkçilərinin animasiya versiyaları ilə danışdığı, onlara ad verdiyi və daha sonra internet saytı yaratmaq və ya uşaqları üçün məktəbdən sonra keçirilən tədbirlər təşkil etmək kimi müxtəlif tapşırıqlar verdiyi video nümayiş etdirilib.
Öz köməkçisindən danışarkən Altman alət üçün illərdir geniş istifadə olunan “agent” ifadəsindən istifadə etməkdən yayınıb. Qismən avtonom işləmək üçün proqramlaşdırılan süni intellekt çatbotları əsasən süni intellekt agentləri kimi tanınır. Altman köməkçilərə sadəcə bir məsuliyyət verildiyini və daha sonra onların işə başlayaraq tapşırığı davam etdirdiyini bildirib.
OpenAI-nin tədbiri ABŞ Prezidenti Donald Trampın texnologiya liderləri və Nümayəndələr Palatasının spikeri Mayk Conson ilə Ağ Evdə təşkil etdiyi naharla eyni vaxtda keçirilib.
Tramp süni intellekt şirkətlərinin özlərini özlərinin nəzarətdə saxlamalı olduğuna dair inancını təkrarlayıb. Sektora nəzarət etmək üçün 10 nəfərlik komitənin yaradılmasını müzakirə etdiklərini deyən ABŞ Prezidenti Donald Tramp nəhəng özünənəzarət mexanizminin qurulacağını bildirib.
Süni intellekt şirkətlərinin modellərindəki pozuntu hallarının getdikcə daha çox ortaya çıxması ilə bəzi tədqiqatçılar və şirkət rəhbərləri süni intellektin inkişafının yavaşladılmasına çağırıb.
Jurnalistlərin suallarını cavablandıran Altman mərkəzçi yolun izlənilməsinin vacib olduğunu bildirib. Altman sənayenin daha məntiqli və praqmatik mövqe sərgiləyəcəyinə ümid etdiyini deyib, lakin konkret şirkət və ya rəhbər adlarını çəkməkdən yayınıb.
OpenAI tədbirdən bir gün əvvəl daxili sınaqlar zamanı ortaya çıxan bəzi təhlükəsizlik problemləri səbəbindən ən son modelinin təqdimatını təxirə saldığını açıqlamışdı.
Şirkət iyul ayından bəri süni intellekt agentlərinin uyğunsuz davranışları ilə bağlı bir sıra problemlərlə məşğul olur.
Süni intellekt platforması Hugging Face-ə istənilmədən sızma, ChatGPT istifadəçilərinin söhbətlərindən götürülmüş görüntülərin üçüncü tərəf internet saytlarında yayımlanması və Avstraliya hökumətinə aid ictimaiyyət üçün nəzərdə tutulmayan məlumatlara giriş əldə edilməsi kimi hadisələr baş verib.
OpenAI və rəqib süni intellekt şirkəti Anthropic daha əvvəl kibertəhlükəsizlik və ya hakerliklə bağlı narahatlıqlar səbəbindən potensial risklərə görə bəzi süni intellekt modellərinin ictimaiyyətə açıq versiyasını təxirə salmışdı.
Bir süni intellekt sistemində qanuni nəzarətin itirilməsi ehtimalını gündəmə gətirən Altman gücün az sayda şirkətdə, şəxsdə və ya ölkədə cəmləşməsinin təhlükələrinə diqqət çəkib.
Həm OpenAI-nin, həm də Anthropic-in qarşıdakı aylarda birjada fəaliyyət göstərməsi gözlənilir. Anthropic-in bu il, OpenAI-nin isə 2027-ci ildə ilkin kütləvi təklif vasitəsilə səhmlərinin satışını həyata keçirməsi planlaşdırılır.
Şirkətinin səhmlərini açıq bazarlarda satmağa istəkli olduğunu vurğulayan Altman OpenAI-nin birjaya çıxmaq üçün çox uzun müddət gözləməsinin dünya üçün pis olacağını müdafiə edib.
Hər iki şirkət son zamanlarda süni intellektin ictimai infrastruktur və ya ictimai təhlükəsizlik üçün genişmiqyaslı real risk yaratdığına inandıqlarını açıq şəkildə ifadə edir.
Ötən həftə Birləşmiş Millətlər Təşkilatında çıxış edən Altman süni intellekt alətinin imkanlarını ölçmək, riskləri qiymətləndirmək və bu cür alətlər üzərində insan nəzarətinin dərəcəsini müəyyən etmək üçün milli və beynəlxalq standartların müəyyənləşdirilməsinə çağırıb.
Anthropic-in baş direktoru Dario Amodei də Birləşmiş Millətlər Təşkilatına verdiyi açıqlamada süni intellektin sürətlənən inkişafının düzgün idarə edilməməsi və nəzarətdə saxlanılmaması halında texnologiyanın gələcək versiyalarının bütövlükdə bəşəriyyət üçün risk yarada biləcəyini bildirib.
