Almaniyada inflyasiya 3,3 faizə yüksəldi
Almaniyada illik inflyasiya Yaxın Şərqdə artan qarşıdurmaların enerji xərclərini yüksəltməsi ilə sentyabrda gözləntiləri üstələyərək 3,3 faizə çatıb və 2023-cü ilin dekabrından bəri ən yüksək səviyyəyə yüksəlib.
AFN.az xəbər verir ki, Almaniya Federal Statistika İdarəsi (Destatis) sentyabr ayına dair istehlak qiymətləri indeksinin (İQİ) ilkin məlumatlarını açıqlayıb.
Buna görə, ölkədə iyulda 2,8 faiz, avqustda isə 2,9 faiz olan illik inflyasiya sentyabrda 3,3 faizə yüksəlib.
İQİ-nin Avropa Mərkəzi Bankının (ECB) 2 faizlik hədəf səviyyəsindən yuxarı olaraq qalması da diqqət çəkib.
Almaniyada aylıq əsasda İQİ 0,6 faiz artıb. Avropa İttifaqı (Aİ) ilə uyğunlaşdırılmış İQİ də illik 3,3 faiz, aylıq isə 0,6 faiz təşkil edib.
Bazar iştirakçıları Aİ ilə uyğunlaşdırılmış İQİ-nin 3 faizə, milli standartlara əsaslanan İQİ-nin isə 3,1 faizə yüksələcəyini proqnozlaşdırırdı.
Sentyabrda ərzaq və enerji xərcləri nəzərə alınmadan hesablanan baza inflyasiyası 2,4 faiz səviyyəsində sabit qaldığı halda, inflyasiyanın yüksəlməsinin əsas səbəbi yenə enerji qiymətləri olub.
Ölkədə enerji məhsullarının qiymətləri sentyabrda ötən ilin eyni dövrü ilə müqayisədə 14,9 faiz artıb. Sözügedən artım iyulda 8,3 faiz, avqustda isə 10,5 faiz təşkil etmişdi.
Bu arada, Avrozonada avqust ayında 3,2 faiz təşkil edən illik inflyasiya ECB-nin 2 faizlik orta müddətli hədəfindən xeyli yüksək olaraq qalmaqda davam edir.
Neft qiymətlərindəki şokun gücləndirdiyi inflyasiya təzyiqləri ilə mübarizə aparan ECB sonuncu dəfə sentyabrın 10-da keçirilən iclasında depozit faiz dərəcəsini 25 baza bəndi artıraraq 2,50 faizə yüksəltmişdi. Bu addım bankın il ərzində həyata keçirdiyi ikinci faiz artımı kimi qeydə alınmışdı.
Almaniyada sentyabrda inflyasiyanın 3,3 faizə yüksəldiyini göstərən məlumatların ardından investorların ECB-dən yeni faiz artımları gözləməsi ilə Almaniya dövlət istiqrazlarının faizləri yüksəlib, istiqraz qiymətləri isə geriləyib.
Digər tərəfdən, Avrozonanın digər iri iqtisadiyyatlarından daxil olan məlumatlar da narahatlıq doğurur. İllik inflyasiya İspaniyada 5,0 faizə, İtaliyada 4,1 faizə, Fransada isə son iki ilin ən yüksək səviyyəsi olan 3,4 faizə yüksəlib.
İri iqtisadiyyatlarda baş verən bu artımların ardından analitiklər avqustda 3,2 faiz təşkil edən Avrozonanın ümumi inflyasiyasının sentyabrda 3,5-3,6 faiz səviyyəsinə çata biləcəyini proqnozlaşdırırlar.
Maliyyə bazarlarında iqtisadi artımı zəiflətmək riskinə baxmayaraq, inflyasiya nəzarət altına alınana qədər sərt pul siyasəti tədbirlərinin və yeni sərtləşdirmə addımlarının qarşıdakı aylarda da davam edə biləcəyi gözlənilir.
