Təyyarədə taxtabitilər aşkarlandı: Reysi ləğv edildi
Avstraliyanın Qantas aviaşirkətinin Roma-Perth reysi təyyarədə taxtabitilərin aşkarlanması səbəbindən ləğv edilib. Əvvəlki uçuşda sərnişinlər həşərat dişləmələrindən şikayət etdikləri üçün təyyarə hərtərəfli təmizlik və texniki xidmət işləri aparılması məqsədilə istismardan çıxarılıb. Sərnişinlər alternativ reyslərə yönləndirilib.
AFN.az xəbər verir ki, Avstraliyanın Qantas aviaşirkətinə məxsus Boeing 787 Dreamliner tipli təyyarə taxtabitilərin yayılması səbəbindən uçuşlardan kənarlaşdırılıb.
“Sydney Morning Herald” qəzetinin məlumatına görə, cümə günü Perthdən Romaya təxminən 17 saat davam edən uçuş zamanı bəzi sərnişinlər həşəratlar tərəfindən dişləndiklərini bildiriblər. Qaşınmanı azaltmaq üçün sərnişinlərə antihistamin dərmanlar verildiyi, lakin dərmanların tükəndiyi iddia olunub.
Şirkət şənbə günü həyata keçirilməsi planlaşdırılan Roma-Perth reysinin ekonom sinifindəki bəzi oturacaqlarda problem aşkarlandıqdan sonra ləğv edildiyini açıqlayıb. Təyyarə hərtərəfli təmizlik və texniki xidmət işləri üçün istismardan çıxarılıb.
Qantas sərnişinlərdən üzr istəyərək, təsirlənən şəxslərin yerləşmə ilə təmin olunduğunu və 48 saat ərzində alternativ reyslərə yönləndirildiyini bildirib.
Kiçik və qanadsız parazitlər olan taxtabitilər geyimlərdə, mebellərdə və yataq dəstlərində yaşaya bilirlər. Onların dişləmələri qaşınmaya səbəb olsa da, adətən daha ciddi sağlamlıq problemlərinə yol açmır. Bununla belə, bu həşəratlardan xilas olmaq çətin və baha başa gələ bilər.
Taxtabitilər nəqliyyat sektorunda əvvəllər də fasilələrə səbəb olub. İngiltərədə iki həftədən az əvvəl sürücü kabinələrində taxtabitilərin görülməsi səbəbindən bəzi qatar reysləri ləğv edilib.
