Yaponiya: Tayvan boğazında sülh bütün beynəlxalq ictimaiyyət üçün vacibdir
Yaponiya hökuməti Çinin suverenlik mübahisəsi olan Tayvan ətrafında elan edilən hərbi təlimdən sonra Tayvan boğazında sülh və sabitliyin vacibliyinə diqqət çəkib.
Yaponiya Nazirlər Kabinetinin Baş Katibi Hayaşi Yoşimasa keçirdiyi mətbuat konfransında Çinin təşəbbüsü ilə ada yaxınlığında keçirilən hərbi təlimdən danışıb.
"Tayvan boğazında sülh və sabitlik təkcə ölkəmizin milli təhlükəsizliyi üçün deyil, həm də bütün beynəlxalq ictimaiyyətin sabitliyi üçün vacibdir" - deyə Hayaşi bildirib.
Çin və Tayvan münasibətlərindəki inkişafları yaxından izlədiklərini qeyd edən Hayaşi, Yaponiyanın Tayvan ətrafındakı problemlərin dialoq yolu ilə sülh yolu ilə həll edilməsinə dair yanaşmasını bir daha bəyan edib.
Yaponiya mediasında yayılan xəbərlərə görə, bu gün səhər saatlarında Çin ordusu ada yaxınlığında hərbi təlimlərə başlayıb.
Təlimin Tayvanda keçirilən prezident seçkilərində qalib gələn Lai Çinq-tenin mayın 20-də and içməsindən sonra təşkil edilməsi diqqət çəkib.
