ABŞ-də süni intellektin adı rəsmi olaraq dəyişdirildi
ABŞ Prezidenti Donald Tramp “süni intellekt” (AI) əvəzinə “super intellekt” (SI) terminindən istifadə edilməsini nəzərdə tutan prezident fərmanını imzalayıb.
AFN.az xəbər verir ki, Ağ Ev tərəfindən yayımlanan məlumat qeydində bildirilir ki, fərman bütün nazirlik və qurumların rəsmi yazışmalarda, ictimaiyyətə açıqlamalarda, siyasət sənədlərində və hüquqi xarakter daşımayan bütün sənədlərdə “super intellekt” və “SI” terminlərindən istifadə etməsini məcburi edir.
Fərman həmçinin Prezidentin Elm və Texnologiya müşavirinə bu texnologiyanın mövcud vəziyyətini əks etdirən “super intellekt” tərifi hazırlamaq tapşırığı verir.
Digər tərəfdən, Tramp aparıcı texnologiya şirkətlərinin rəhbərləri ilə imzaladıqları sənədi sosial media hesabında paylaşıb.
Tramp ilə “Ağ Ev Super İntellekt Memorandumu” adlı sənədi imzalayan Alphabet-in baş direktoru (CEO) Sundar Piçai, Anthropic-in CEO-su Dario Amodei, Meta-nın CEO-su Mark Zuckerberq, OpenAI-nin prezidenti Qreq Brokman, xAI-nin CEO-su İlon Mask və Nvidia-nın CEO-su Jensen Huanq məsuliyyətli texnologiya inkişafına dair öhdəliklər götürüblər.
Paylaşılan sənəddə “ABŞ xalqı və dünya üçün müsbət gələcək qurmaq məqsədilə hər bir şirkətin öz texnologiyasını təhlükəsiz şəkildə və müştərilərdə, eləcə də ictimaiyyətdə etimad yaradacaq şəkildə inkişaf etdirməyə məsul olduğuna inanırıq” ifadəsinə yer verilib.
Sənəddə qeyd olunur ki, bu vəziyyət qabaqcıl modelləri öyrədən və istifadəyə verən hər bir şirkətin texnologiyalarının nəzərdə tutulduğu kimi işləməsini və hər hansı problemin dərhal aşkar edilərək həll olunmasını təmin etmək üçün möhkəm daxili proseslərə və nəzarət mexanizmlərinə malik olması ilə başlayacaq və şirkətlərin tətbiq etməli olduğu nəzarət və yoxlamalar sadalanıb.
Sənəddə sözügedən addımların hər bir şirkətə, müştərilərinə və ictimaiyyətə texnologiyanın nəzərdə tutulduğu kimi işlədiyinə dair inam verəcəyi vurğulanıb.
Şirkətlərin sistemlərinin təhlükəsizliyini artırmaq məqsədilə standartları və ən yaxşı təcrübələri müəyyən etmək üçün müntəzəm olaraq toplanacağı bildirilən sənəddə, “Zamanla bu addımları qanunlara və ya qaydalara çevirmək məntiqli ola bilər. Bunun şirkətlərdən tələb edilib-edilməməsindən asılı olmayaraq, bu nəzarət və yoxlamaları tətbiq etməyin hər kəs üçün təhlükəsiz gələcəyi təmin etməkdə kritik əhəmiyyət daşıdığına inanırıq və şirkətlərimizin hər biri bunu etməyə qərarlıdır” ifadələrindən istifadə edilib.
